ಇಂದು ದೇಶದಲ್ಲಿ 73ನೇ ಗಣರಾಜ್ಯೋತ್ಸವದ ಸಂಭ್ರಮ. ದೆಹಲಿಯ ರಾಜಪಥ್, ಗಣತಂತ್ರದ ಸಂಭ್ರಮಕ್ಕೆ ಸಾಕ್ಷಿ ಆಗ್ತಿದೆ. ಆದರೆ ಕೊರೊನಾ ಹೆಚ್ಚುತ್ತಿರುವ ಹಿನ್ನೆಲೆ, ಈ ವರ್ಷದ ಗಣರಾಜ್ಯೋತ್ಸವ ಪರೇಡ್ ವೀಕ್ಷಣೆಗೆ ಕೇವಲ 5 ಸಾವಿರದಿಂದ 8 ಸಾವಿರ ಜನರಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಈ ಮೊದಲು 24 ಸಾವಿರ ಜನರಿಗೆ ಪರೇಡ್ ವೀಕ್ಷಣೆಗೆ ಅವಕಾಶ ಕೊಡಲಾಗುವುದು ಎಂದು ಸರ್ಕಾರ ಹೇಳಿತ್ತು. ಆದರೆ ಒಮಿಕ್ರಾನ್ ಸೋಂಕು ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. 2 ಡೋಸ್ ಕೊರೊನಾ ಲಸಿಕೆ ತೆಗೆದುಕೊಂಡವರು ಮಾತ್ರ ಪರೇಡ್ ವೀಕ್ಷಣೆ ಮಾಡಬಹುದಾಗಿದೆ.
10 ಗಂಟೆಯಿಂದ ಪಥಸಂಚಲನ
ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಈ ಭಾರೀ ತೀವ್ರವಾದ ಚಳಿ ಹಾಗೂ ಶೀತಗಾಳಿಯಿದೆ. ಹೀಗಾಗಿ ಈ ಬಾರಿ ಗಣರಾಜ್ಯೋತ್ಸವ ಆಚರಣೆಗಳು ತಡವಾಗಿ ಆರಂಭವಾಗಲಿವೆ ಅಂತ ರಕ್ಷಣಾ ಇಲಾಖೆ ಮಾಹಿತಿ ನೀಡಿದೆ.. ಇಷ್ಟು ವರ್ಷ ಬೆಳಗ್ಗೆ 10 ಗಂಟೆಗೆ ಪಥಸಂಚಲನ ಆರಂಭವಾಗುತಿತ್ತು. ಆದ್ರೆ ಈ ಬಾರಿ ರಾಜಪಥ್ನಲ್ಲಿ ಪಥಸಂಚಲನ ಬೆಳಗ್ಗೆ 10.30ಕ್ಕೆ ಶುರುವಾಗಲಿದೆ. ರಾಜಪಥ್ದಿಂದ ರಾಷ್ಟ್ರೀಯ ಕ್ರೀಡಾಂಗಣದವರೆಗೆ ಸಾಗುವ ಪರೇಡ್ ಅಂತಿಮವಾಗಿ ಕೆಂಪು ಕೋಟೆಯನ್ನು ತಲುಪುತ್ತದೆ.
ವಿವಿಧ ದಶಕಗಳ ಸೇನಾ ಸಮವಸ್ತ್ರಗಳ ಪ್ರದರ್ಶನ
ಗಣರಾಜ್ಯೋತ್ಸವದ ಪರೇಡ್ನಲ್ಲಿ ಪ್ರತಿ ವರ್ಷದಂತೆ ಈ ಬಾರಿ ಕೂಡ ಸಶಸ್ತ್ರ ಪಡೆಗಳ ಬಲಾಬಲ ಪ್ರತಿಬಿಂಬವಾಗಲಿದೆ. ಭೂಸೇನೆಯ 6, ನೌಕಾಪಡೆ ಮತ್ತು ವಾಯುಪಡೆಯ ಒಂದೊಂದು ತುಕಡಿಗಳು ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಲಿವೆ. ಇದಲ್ಲದೆ 4 ಕೇಂದ್ರ ಸಶಸ್ತ್ರ ಪಡೆಗಳು, 2 NCC ದಳಗಳು, 1 ದೆಹಲಿ ಪೊಲೀಸ್ ಮತ್ತು 1 NSS ದಳಗಳು ಪರೇಡ್ನಲ್ಲಿ ಭಾಗವಹಿಸಲಿವೆ ಹಾಗೂ ವಿವಿಧ ದಶಕಗಳಲ್ಲಿ ಭಾರತೀಯ ಸೇನೆ ಧರಿಸಿರುವ ಸಮವಸ್ತ್ರಗಳು ಮತ್ತು ಆಯುಧಗಳ ಪ್ರದರ್ಶನ ಮಾಡಲಾಗುತ್ತದೆ.
5 ರಫೇಲ್ ಜೆಟ್ ವಿಮಾನಗಳು ಭಾಗಿ
ಈ ಬಾರಿಯ ಪರೆಡ್ನಲ್ಲಿ 27 ಬ್ಯಾಂಡ್ಗಳು ಮೊಳಗಲಿವೆ. ಆ ಪೈಕಿ 22 ಭಾರತೀಯ ಸಶಸ್ತ್ರ ಪಡೆಗಳ ಬ್ಯಾಂಡ್ಗಳಾಗಿವೆ. ಹಾಗೂ ವಂದೇ ಭಾರತಂ ಸ್ಪರ್ಧೆಯಿಂದ ಆಯ್ಕೆಯಾದ ಕಲಾವಿದರು ಬ್ಯಾಂಡ್ಗಳಲ್ಲಿ ಭಾಗಿಯಾಗಲಿದ್ದಾರೆ. ಇದೇ ವೇಳೆ ಪರೇಡ್ನಲ್ಲಿ 2 ಬೈಕ್ಗಳ ಪ್ರದರ್ಶನದ ಜೊತೆಗೆ BSFನ ಮಹಿಳಾ ಮುಖ್ಯ ತಂಡದಿಂದ ಪಥಸಂಚಲನ ಕೂಡ ಇರಲಿದೆ. ಅಮೃತ ಮಹೋತ್ಸವದ ಹಿನ್ನಲೆಯಲ್ಲಿ 75 ವಿಮಾನಗಳಿಂದ ವೈಮಾನಿಕ ಪ್ರದರ್ಶನ ಇರಲಿದೆ. ಈ 75 ಯುದ್ಧ ವಿಮಾನಗಳ ಪೈಕಿ ಹೊಸದಾಗಿ ಭಾರತ ಸೇನೆ ಸೇರಿದ 5 ರಪೇಲ್ ವಿಮಾನಗಳು ಕೂಡ ಇರಲಿವೆ.
ರಾಜ್ಯದ ಸ್ತಬ್ಧಚಿತ್ರ ಪ್ರದರ್ಶನ
ಗಣರಾಜ್ಯೋತ್ಸವ ಕೇಂದ್ರ ಬಿಂದು ರಾಜಪಥ್ನಲ್ಲಿ ಕರ್ನಾಟಕದ ಕರಕುಶಲ ವಸ್ತುಗಳ ಸ್ತಬ್ಧಚಿತ್ರ ಗಮನ ಸೆಳೆಯಲಿದೆ. ಪಥ ಸಂಚಲನದಲ್ಲಿ ಕರ್ನಾಟಕವು ಸತತವಾಗಿ 13 ವರ್ಷದಿಂದ ತನ್ನ ಸ್ತಬ್ಧಚಿತ್ತವನ್ನು ಪ್ರಸ್ತುತ ಪಡಿಸುತ್ತಿದೆ. ಈ ಬಾರಿ ಇಡೀ ದಕ್ಷಿಣ ಭಾರತದಿಂದ ಕರ್ನಾಟಕದ ಸ್ತಬ್ದಚಿತ್ರ ಮಾತ್ರ ಪ್ರದರ್ಶನವಾಗುತ್ತಿದೆ. ಒಟ್ಟು 21 ಸ್ತಬ್ದಚಿತ್ರಗಳ ಪ್ರದರ್ಶನ ಆಗುತ್ತಿದೆ. ಆ ಪೈಕಿ 12 ರಾಜ್ಯ ಸರ್ಕಾರಗಳು ಹಾಗೂ ಕೇಂದ್ರ ಸರ್ಕಾರದ 9 ಇಲಾಖೆಗಳು ಸ್ತಬ್ದಚಿತ್ರಗಳನ್ನು ರಚಿಸಿವೆ.
ಗಣರಾಜ್ಯೋತ್ಸವದ ಅಂಗವಾಗಿ ದೆಹಲಿಯ ವಿಜಯ್ ಚೌಕ್ನಲ್ಲಿ ಡ್ರೋನ್ಗಳಿಂದ ಮೂಡಿ ಬಂದ ಆಕರ್ಷಕ ಚಿತ್ತಾರಗಳು ಮನಸೆಳೆಯುವಂತಿವೆ. ಗಣರಾಜ್ಯೋತ್ಸವದ ಮುನ್ನಾ ದಿನದಂದು ವಿಜಯ್ ಚೌಕ್ನಲ್ಲಿ ಬೀಟಿಂಗ್ ರಿಟ್ರೀಟ್ ಸಮಾರಂಭದ ಭಾಗವಾಗಿ 1000 ಮೇಡ್ ಇನ್ ಇಂಡಿಯಾ ಡ್ರೋನ್ ಗಳಿಂದ ಮೂಡಿಬಂದ ವಿಭಿನ್ನ ರಚನೆಗಳು ನೋಡುಗರ ಮನಸೂರೆಗೊಳ್ಳುವಂತಿವೆ.