ಏಡ್ಸ್ ರೋಗಿಯಲ್ಲಿ ಮೊದಲ ಬಾರಿ ಕಂಡುಬಂದಿರುವ B.1.1.529 ಅಲಿಯಾಸ್ ಒಮಿಕ್ರಾನ್ ಹೆಸರಿನ ಮ್ಯೂಟಂಟ್ ಕೊರೊನಾ ವೈರಸ್ ಈಗ ವಿಶ್ವಾದ್ಯಂತ ಆತಂಕಕ್ಕೆ ಕಾರಣವಾಗಿದೆ. ದಕ್ಷಿಣ ಆಫ್ರಿಕಾದಲ್ಲಿ ನವೆಂಬರ್ 9 ರಂದು ಕೊರೊನಾ ಸೋಂಕಿತನ ಸ್ಯಾಂಪಲ್ಸ್ಗಳನ್ನು ಪಡೆಯಲಾಗಿತ್ತು. ಬಳಿಕ ಅದನ್ನು ಜಿನೊಮಿಕ್ ಸ್ಟಡಿಗೆ ಒಳಪಡಿಸಿದಾಗ ಮೊದಲ ಬಾರಿ ನವೆಂಬರ್ 24ರಂದು ಹೊಸ ತಳಿ ಇರೋದು ದೃಢಪಟ್ಟಿತ್ತು. ಸದ್ಯ ದಕ್ಷಿಣ ಆಫ್ರಿಕಾದಲ್ಲಿ ಈ ತಳಿ ಸಾಕಷ್ಟು ವೇಗವಾಗಿ ಹರಡುತ್ತಿದೆ. ಇದೇ ಕಾರಣದಿಂದ ವಿಶ್ವ ಆರೋಗ್ಯ ಸಂಸ್ಥೆ ಈ ತಳಿಯನ್ನು ವೇರಿಯಂಟ್ ಆಫ್ ಕನ್ಸರ್ನ್ ಎಂದು ಕರೆದಿದೆ.
ಹೀಗಾಗಿ ಕೊರೊನಾ ರೂಪಾಂತರಿ ಒಮಿಕ್ರಾನ್ ಇಡೀ ವಿಶ್ವವನ್ನ ಮತ್ತೆ ತಲ್ಲಣಗೊಳಿಸಿದೆ. ದಕ್ಷಿಣ ಆಫ್ರಿಕಾದಲ್ಲಿ ಕಂಡು ಬಂದ ಈ ತಳಿ, ಸದ್ಯ ಬ್ರಿಟನ್, ಜರ್ಮನಿ ಸೇರಿ ವಿಶ್ವದ 9 ರಾಷ್ಟ್ರಗಳಲ್ಲಿ ಕಂಡು ಬಂದಿದೆ. ಹೀಗಾಗಿಯೇ ಇಸ್ರೇಲ್ ಸಂಪೂರ್ಣ ಅಂತಾರಾಷ್ಟ್ರೀಯ ಪ್ರವಾಸಿಗರ ಆಗಮನವನ್ನು ನಿಷೇಧಿಸಿದ್ದರೆ, ಅಮೆರಿಕಾ ಹಾಗೂ ಇಂಗ್ಲೆಂಡ್ ದಕ್ಷಿಣ ಆಫ್ರಿಕಾ ಸೇರಿ ಸುಮಾರು 14 ಆಫ್ರಿಕನ್ ರಾಷ್ಟ್ರಗಳಿಗೆ ನಿಬಂಧನೆಯನ್ನು ಹೇರಿವೆ. ಈ ನಿಟ್ಟಿನಲ್ಲಿ ಭಾರತದಲ್ಲಿಯೂ ಹೈ ಅಲರ್ಟ್ ಘೋಷಿಸಲಾಗಿದೆ.
ಒಮಿಕ್ರಾನ್ ಕಂಟ್ರೋಲ್ಗೆ ಭಾರತದ ಕ್ರಮ
- ಒಮಿಕ್ರಾನ್ ಕಂಟ್ರೋಲ್ಗೆ ಭಾರತ ಹಲವು ನಿಯಮ ಜಾರಿ
- ವಿಮಾನ ನಿಲ್ದಾಣಗಳಲ್ಲಿ ವಿದೇಶಿ ಪ್ರಯಾಣೀಕರಿಗೆ ತಪಾಸಣೆ
- ಮ್ಯೂಟಂಟ್ ಲಕ್ಷಣ ಕಂಡು ಬಂದರೆ ಕೂಡಲೇ ಕ್ವಾರಂಟೀನ್
- ವಿದೇಶಿ ಪ್ರಯಾಣಿಕರ ನಿಕಟ ಸಂಪರ್ಕಿತರ ಮೇಲೆಯೂ ನಿಗಾ
- ದಕ್ಷಿಣ ಆಫ್ರಿಕಾದಿಂದ ಬರುವ ವಿಮಾನಯಾನ ಬಂದ್ ಆಗಿದೆ
- ವಿಮಾನಯಾನ ಸ್ಥಗಿತಕ್ಕೆ ದಕ್ಷಿಣ ಆಫ್ರಿಕಾ ಸಹಜ ಆಕ್ರೋಶ ವ್ಯಕ್ತ
