ದೇಶದಲ್ಲಿ ಇಂದು ಬರೋಬ್ಬರಿ 162 ಕೋಟಿ ಡೋಸ್ಗಳಿಗಿಂತ ಅಧಿಕ ಕೊರೊನಾ ವ್ಯಾಕ್ಸಿನ್ ಅನ್ನು ನೀಡಲಾಗಿದೆ. ವ್ಯಾಕ್ಸಿನ್ ಮೈತ್ರಿ ಹೆಸರಲ್ಲಿ 90ಕ್ಕೂ ಅಧಿಕ ರಾಷ್ಟ್ರಗಳಿಗೂ ಭಾರತ ವ್ಯಾಕ್ಸಿನ್ ಅನ್ನು ಪೂರೈಕೆ ಮಾಡಿದೆ. ಇವತ್ತು ದೇಶದಲ್ಲಿ ಪ್ರತಿನಿತ್ಯ ಲಕ್ಷಾಂತರ ಕೇಸ್ಗಳು ದಾಖಲಾಗುತ್ತಿದ್ದರೂ, ಸಾವು-ನೋವಿನಲ್ಲಿ ಇಳಿಕೆ ಇರಲು ಪ್ರಮುಖ ಕಾರಣ ಅಂದ್ರೆ ವ್ಯಾಕ್ಸಿನ್ಗಳು.
ಇಂದು ಇಡೀ ವಿಶ್ವದಲ್ಲಿಯೇ ಅತ್ಯಧಿಕ ಡೋಸ್ಗಳಷ್ಟು ವ್ಯಾಕ್ಸಿನ್ ಅನ್ನು ಭಾರತ ನೀಡಿದೆ. ವಿಶ್ವದ ಶ್ರೀಮಂತ ರಾಷ್ಟ್ರಗಳು ಸ್ವಾರ್ಥ ಮೆರೆಯುತ್ತಿದ್ದಾಗ ಹಲವಾರು ರಾಷ್ಟ್ರಗಳಿಗೆ ವ್ಯಾಕ್ಸಿನ್ ನೀಡುವುದರ ಮೂಲಕ ಭಾರತ ಆಪತ್ಬಾಂಧವನಾಗಿ ಹೊರಹೊಮ್ಮಿದೆ. ವಿಶೇಷ ಅಂದ್ರೆ ಭಾರತ ವ್ಯಾಕ್ಸಿನ್ನಲ್ಲಿ ಇಷ್ಟು ಸ್ವಾವಲಂಬಿಯಾಗಲು ಪ್ರಮುಖ ಕಾರಣ ಅಂದ್ರೆ, ಈ ವ್ಯಾಕ್ಸಿನ್ಗಳು ಮೇಡ್ ಇನ್ ಇಂಡಿಯಾ.
ಹೌದು ಇಡೀ ವಿಶ್ವದಲ್ಲಿ ಕೊರೊನಾ ತಾಂಡವವಾಡುತ್ತಿದ್ದಾಗ ಭಾರತದ ಎರಡು ಕಂಪನಿಗಳು ತಮ್ಮ ಸರ್ವಸ್ವವನ್ನೂ ಒತ್ತೆಯಿಟ್ಟು ವ್ಯಾಕ್ಸಿನ್ ಉತ್ಪಾದಿಸಲು ನಿರ್ಧರಿಸುತ್ತವೆ. ಅದ್ರಲ್ಲೂ ಪುಣೆಯ ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಅಂತೂ 2020ರ ಸೆಪ್ಟಂಬರ್ನಲ್ಲಿಯೇ ಇಂಗ್ಲೆಂಡ್ನ ಆ್ಯಸ್ಟ್ರಾಝೆನಿಕಾ ಸಂಸ್ಥೆ ಜೊತೆ ಒಪ್ಪಂದ ಮಾಡಿಕೊಂಡು, ಟೆಸ್ಟ್ ಸಂಪೂರ್ಣವಾಗದಿದ್ರೂ ಕೋಟಿಗಟ್ಟಲೇ ವ್ಯಾಕ್ಸಿನ್ ಉತ್ಪಾದಿಸಲು ಆರಂಭಿಸಿಬಿಡುತ್ತೆ. ಊಹಿಸಿ ನೋಡಿ ಒಂದು ವೇಳೆ ಈ ವ್ಯಾಕ್ಸಿನ್ ಏನಾದ್ರೂ ಎಫೆಕ್ಟಿವ್ ಅಲ್ಲದೇ ಹೋಗಿದ್ರೆ ಬಹುಶಃ ಇಡೀ ಸೀರಂ ಇನ್ಸ್ಟಿಟ್ಯೂಟ್ ಮುಳುಗಿ ಹೋಗುವ ಸಾಧ್ಯತೆ ಇತ್ತು. ಆದರೂ ಈ ಸಂಸ್ಥೆ ರಿಸ್ಕ್ ತೆಗೆದುಕೊಳ್ಳುತ್ತೆ. ಆ ವ್ಯಾಕ್ಸಿನ್ನೇ ಕೋವೀ ಶೀಲ್ಡ್.
ಇನ್ನೊಂದೆಡೆ ಹೈದರಾಬಾದ್ನ ಭಾರತ್ ಬಯೋಟೆಕ್ ಸಂಸ್ಥೆ ಹಾಗೂ ಐಸಿಎಂಆರ್ ಜಂಟಿಯಾಗಿ ಸಂಪೂರ್ಣ ಭಾರತದ್ದೇ ಆದ ಭಾರತವೇ ತಯಾರಿಸಿದ ವ್ಯಾಕ್ಸಿನ್ ತಯಾರಿಸುತ್ತೆ. ಇದಕ್ಕೆ ಸ್ವದೇಶದಲ್ಲೇ ಹಲವು ಪಟ್ಟಭದ್ರ ಹಿತಾಸಕ್ತಿಗಳು ಅಡ್ಡಗಾಲು ಹಾಕಲು ಆರಂಭಿಸಿರುತ್ತವೆ. ಹಾಗಿದ್ರೂ ಈ ಸಂಸ್ಥೆ ಎದೆಗುಂದಲ್ಲ. ಸ್ವತಃ ಪ್ರಧಾನಿ ನರೇಂದ್ರ ಮೋದಿಯೇ ಈ ಸಂಸ್ಥೆಯ ವ್ಯಾಕ್ಸಿನ್ ಪಡೆದುಕೊಳ್ಳುತ್ತಾರೆ. ಆ ವ್ಯಾಕ್ಸಿನ್ನೇ ಕೊವ್ಯಾಕ್ಸಿನ್..!
ಕೃತಜ್ಞತೆ ಮೆರೆದ ಕೇಂದ್ರ
ಈ ಸಂಸ್ಥೆಗಳ ತ್ಯಾಗ ಹಾಗೂ ಪ್ರಖರ ಸಂಕಲ್ಪದ ಕಾರಣದಿಂದಾಗಿ ಭಾರತದಲ್ಲಿ 2021ರ ಜನವರಿ 16 ರಿಂದ ವ್ಯಾಕ್ಸಿನೇಷನ್ ಆರಂಭವಾಗುತ್ತೆ. ಇಂದು ಇಡೀ ವಿಶ್ವವೇ ಭಾರತದ ವ್ಯಾಕ್ಸಿನ್ಗೆ ಎದುರು ನೋಡುತ್ತಿದೆ. ಅಮೆರಿಕಾ ಸಹ ಬೂಸ್ಟರ್ ಡೋಸ್ಗಾಗಿ ಕೊವ್ಯಾಕ್ಸಿನ್ ಕೇಳುವಂತೆ ಈಗ ಆಗಿದೆ. ಈ ಎರಡೂ ಸಂಸ್ಥೆಗಳ ಈ ಸಾಧನೆಗೆ ಈಗ ಭಾರತ ಸರ್ಕಾರ ಕೂಡ ಗೌರವ ಅರ್ಪಿಸಿದೆ.
ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾದ ಛೇರ್ಮನ್ ಸೈರಸ್ ಪೂನಾವಾಲಾ ಹಾಗೂ ಭಾರತ್ ಬಯೋಟೆಕ್ ಸಂಸ್ಥೆಯ ಮುಖ್ಯಸ್ಥರಾಗಿರೋ ಕೃಷ್ಣಾ ಎಲ್ಲಾ ಹಾಗೂ ಅವರ ಪತ್ನಿ ಸುಚಿತ್ರಾ ಎಲ್ಲಾ ಅವರಿಗೆ ಜಂಟಿಯಾಗಿ ಭಾರತ ಮೂರನೇ ಅತ್ಯಂತ ಎತ್ತರದ ನಾಗರಿಕ ಗೌರವ ಪದ್ಮಭೂಷಣವನ್ನು ನೀಡಿರೋದಾಗಿ ಕೇಂದ್ರ ಸರ್ಕಾರ ಘೋಷಿಸಿದೆ.