ಬರೋಬ್ಬರಿ 10 ರಾಜ್ಯಗಳಲ್ಲಿ 27 ಮಹಿಳೆಯರನ್ನು ಮದುವೆಯಾಗಿ ಲಕ್ಷಾಂತರ ರೂಪಾಯಿ ವಂಚಿಸಿದ್ದ ಓಡಿಶಾದ ರಮೇಶ್‌ ಸ್ವೇನ್‌ ಎಂಬಾತನನ್ನು ಜಾರಿ ನಿರ್ದೇಶನಾಲಯ ಬಂಧಿಸಿದೆ. ಇದೇ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಳೆದ ವರ್ಷವಷ್ಟೇ ರಮೇಶ್‌ನನ್ನು ಓಡಿಶಾ ಪೊಲೀಸರು ಬಂಧಿಸಿದ್ದರು. ಈಗ ಮಹಾವಂಚಕನ ವಿರುದ್ಧ ಇಡಿ ಅಕ್ರಮ ಹಣ ವರ್ಗಾವಣೆ ಪ್ರಕರಣವನ್ನು ದಾಖಲಿಸಿದೆ.
ಇಡಿ ಬಂಧಿಸಿರುವ ರಮೇಶ್‌ ಸ್ವೇನ್‌ ಅಪರಾಧ ಹಿನ್ನೆಲೆಯನ್ನು ಗಮನಿಸಿದರೆ ಹಲವು ಆಘಾತಕಾರಿ ಸಂಗತಿಗಳು ಬೆಳಕಿಗೆ ಬರುತ್ತವೆ. ರಮೇಶ್‌ ಸ್ವೇನ್‌ ಬಿಭು ಪ್ರಕಾಶ್‌ ಸ್ವೇನ್‌ ಎಂದು ಕೂಡ ಗುರುತಿಸಿಕೊಂಡಿದ್ದು, 2011ರಲ್ಲಿಯೇ ಈತನ ಬಂಧನವಾಗಿತ್ತು. ಹೈದರಾಬಾದ್‌ನಲ್ಲಿ ಎಂಬಿಬಿಎಸ್‌ ಸೀಟು ಕೊಡಿಸುತ್ತೇನೆ ಎಂದು 2 ಕೋಟಿ ರೂಪಾಯಿಗೂ ಹೆಚ್ಚಿನ ಹಣವನ್ನು ವಸೂಲಿ ಮಾಡಿದ್ದ ಆರೋಪದಲ್ಲಿ ರಮೇಶ್‌ ಸ್ವೇನ್‌ 2011ರಲ್ಲಿ ಬಂಧನವಾಗಿದ್ದ. ಅದಲ್ಲದೇ 2006ರಲ್ಲಿ ಕೇರಳದ 13 ಬ್ಯಾಂಕ್‌ಗಳಲ್ಲಿ 128 ನಕಲಿ ಕ್ರೆಡಿಟ್‌ ಕಾರ್ಡ್‌ಗಳ ಮೂಲಕ 1 ಕೋಟಿ ರೂ.ಗೂ ಹೆಚ್ಚು ಹಣವನ್ನು ತೆಗೆದುಕೊಂಡು ಬ್ಯಾಂಕ್‌ಗಳಿಗೆ ವಂಚಿಸಿದ್ದ. ಈ ಪ್ರಕರಣದಲ್ಲಿ ಕೂಡ ರಮೇಶ್‌ ಸ್ವೇನ್‌ ಅನ್ನು ಬಂಧಿಸಲಾಗಿತ್ತು.
ಓಡಿಶಾದಲ್ಲಿ ದಾಖಲೆಯಾದ ಪ್ರಕರಣದಲ್ಲಿ ಪೊಲೀಸರು ಸ್ವೇನ್‌ನ ಪತ್ನಿಯರಲ್ಲಿ ಒಬ್ಬಳಾದ ಡಾ ಕಮಲಾ ಸೇಠಿ, ಆಕೆಯ ಸಹೋದರಿ ಮತ್ತು ಚಾಲಕನನ್ನು ಬಂಧಿಸಿದ್ದರು. ಬಳಿಕ ಓಡಿಶಾ ಹೈಕೋರ್ಟ್‌ನಿಂದ ಜಾಮೀನು ಪಡೆದಿದ್ದರು. ಆರೋಪಿಯ ವಿರುದ್ಧ ಸಾಕ್ಷಿಗಳನ್ನು, ದಾಖಲೆಗಳನ್ನು ಸಂಗ್ರಹಿಸಲು ಜಾರಿ ನಿರ್ದೇಶನಾಲಯ ಓಡಿಶಾ ಪೊಲೀಸರೊಂದಿಗೆ ನಿರಂತರ ಸಂಪರ್ಕದಲ್ಲಿತ್ತು ಎಂದು ಜಾರಿ ನಿರ್ದೇಶನಾಲಯದ ಅಧಿಕಾರಿಗಳು ಹೇಳಿದ್ದಾರೆ. 66 ವರ್ಷದ ರಮೇಶ್‌ ಸ್ವೇನ್‌ ಯಾವ ರೀತಿ ಅನೇಕ ವರ್ಷಗಳಿಂದ ಹಣಕಾಸು ಅಪರಾಧಗಳನ್ನು ಮಾಡುತ್ತಾ ಬಂದಿದ್ದಾರೆ ಎಂಬುದರ ಮೇಲೆ ಇಡಿ ನಿಗಾ ಇರಿಸಿತ್ತು. ಈಗ ರಮೇಶ್‌ ಸ್ವೇನ್‌ ಅನ್ನು ಬಂಧಿಸಿ, ವಿಚಾರಣೆ ನಡೆಸುತ್ತಿದೆ.
ಇನ್ನು, ಕಳೆದ 8 ತಿಂಗಳಿಂದ ಓಡಿಶಾ ಪೊಲೀಸರ ಕಣ್ಗಾವಲಿನಲ್ಲಿದ್ದ ರಮೇಶ್‌ನನ್ನು ಓಡಿಶಾ ಪೊಲೀಸರ ವಿಶೇಷ ತಂಡ ಫೆಬ್ರವರಿ 13ರಂದು ಬಂಧಿಸಿತ್ತು. ಮೇ 2021ರಲ್ಲಿ ಆತನ 27 ಪತ್ನಿಯರ ಪೈಕಿ ದಿಲ್ಲಿ ಮೂಲದ ಒಬ್ಬರು ನೀಡಿದ ದೂರಿನಂತೆ ರಮೇಶ್‌ನನ್ನು ಬಂಧಿಸಲಾಗಿದೆ. ರಮೇಶ್‌ನನ್ನು 2018ರಲ್ಲಿ ಮ್ಯಾಟ್ರಿಮೋನಿ ಸೈಟ್‌ನಲ್ಲಿ ಭೇಟಿಯಾಗಿ, ಬಳಿಕ ಮದುವೆಯಾಗಿದ್ದೆ. ರಮೇಶ್‌ ಆರೋಗ್ಯ ಸಚಿವಾಲಯದಲ್ಲಿ ಉನ್ನತ ಅಧಿಕಾರಿ ಎಂದು ಹೇಳಿ ನನ್ನನ್ನು ಮದುವೆಯಾಗಿ ವಂಚಿಸಿದ್ದ ಎಂದು ದೂರು ನೀಡಿದ್ದರು.
ಸ್ವೇನ್‌ ಭುವನೇಶ್ವರದಲ್ಲಿ ಮೂರು ಅಪಾರ್ಟ್‌ಮೆಂಟ್‌ಗಳನ್ನು ಬಾಡಿಗೆಗೆ ಪಡೆದಿದ್ದು, ಏಕಕಾಲಕ್ಕೆ ಮೂವರು ಹೆಂಡತಿಯರನ್ನು ಅವುಗಳಲ್ಲಿ ಇರಿಸಿದ್ದ ಎಂದು ಪೊಲೀಸರ ವಿಚಾರಣೆಯಿಂದ ತಿಳಿದುಬಂದಿದೆ. ಮದುವೆಯಾದ ಬಳಿಕ ಅವರಿಂದ ಹಣ ಪಡೆಯುವ ಸ್ವೇನ್‌ ಅವರನ್ನು ಬಿಟ್ಟು ಬೇರೆಯವರನ್ನು ಮದುವೆಯಾಗಲು ಹುಡುಕುತ್ತಿದ್ದ ಎಂಬ ಆಘಾತಕಾರಿ ಮಾಹಿತಿ ಬಂದಿದೆ. ಸ್ವೇನ್‌ ಐಟಿಬಿಪಿ ಸಹಾಯಕ ಕಮಾಂಡೆಂಟ್, ಅಸ್ಸಾಂನಲ್ಲಿ ವೈದ್ಯ, ಛತ್ತೀಸ್‌ಗಢದಲ್ಲಿ ಚಾರ್ಟರ್ಡ್ ಅಕೌಂಟೆಂಟ್, ಕೇರಳದ ಸರ್ಕಾರಿ ಅಧಿಕಾರಿ, ಸುಪ್ರೀಂ ಕೋರ್ಟ್ ಮತ್ತು ದೆಹಲಿ ಹೈಕೋರ್ಟ್‌ನ ವಕೀಲರಾಗಿ ಕೆಲಸ ಮಾಡುತ್ತಿದ್ದೇನೆ ಎಂದು ಮಹಿಳೆಯರನ್ನು ವಂಚಿಸಿದ್ದಾನೆ.
