ಮೀರತ್ : ಉತ್ತರಪ್ರದೇಶದ ಮೀರತ್ನಲ್ಲಿ ಕೆಲಸ ಮಾಡುವ ಮಹಿಳಾ ಪೊಲೀಸ್ ಪೇದೆಯೊಬ್ಬರು ಪೊಲೀಸ್ ಅಧಿಕಾರಿಯಾದ ಮಾವನಿಂದ ರೇಪ್ಗೊಳಗಾಗಿರುವುದು ಬೆಳಕಿಗೆ ಬಂದಿದೆ. ಇಷ್ಟು ಸಾಲದೆಂಬಂತೆ, ಈ ಸಂಗತಿ ತಿಳಿದ ಆಕೆಯ ಪೊಲೀಸ್ ಗಂಡ, ಕಾನೂನು ಬಾಹಿರವಾದ ಟ್ರಿಪಲ್ ತಲಾಖ್ ಹೇಳಿ ಆಕೆಗೆ ವಿಚ್ಛೇದನ ನೀಡಿದ್ದಾನೆ ಎನ್ನಲಾಗಿದೆ!
ಕಳೆದ ಬುಧವಾರ ರಾತ್ರಿ ಸಂತ್ರಸ್ತ ಮಹಿಳಾ ಪೇದೆಯು ಮನೆಯಲ್ಲಿ ಒಬ್ಬಳೇ ಇದ್ದಾಗ ಪ್ರಾವಿಂಷಿಯಲ್ ಆರ್ಮ್ಸ್ ಕಾನ್ಸಟಬುಲರಿಯ ಅಧಿಕಾರಿ ಮಾವ ನಜೀರ್ ಅಹಮದ್ ಬಂದು ಅತ್ಯಾಚಾರ ಎಸಗಿದ. ಈ ಬಗ್ಗೆ ಯಾರಿಗಾದರೂ ಹೇಳಿದಲ್ಲಿ ಸಾಯಿಸಿಬಿಡುವುದಾಗಿ ಬೆದರಿಕೆ ಹಾಕಿದ ಎನ್ನಲಾಗಿದೆ.
ತನ್ನ ಮೇಲೆ ನಡೆದ ಅತ್ಯಾಚಾರದ ವಿಷಯವನ್ನು ಪೊಲೀಸ್ ಅಧಿಕಾರಿಯಾದ ತನ್ನ ಪತಿ ಅಬೀದ್ಗೆ ಆಕೆ ಹೇಳಿಕೊಂಡಿದ್ದಾಳೆ. ಆದರೆ, ಅವಳಿಗೆ ಸಹಾಯ ಮಾಡುವ ಬದಲು, ಆತ ತಕ್ಷಣ ನಿಷೇಧಿತ ಟ್ರಿಪಲ್ ತಲಾಖ್ ಪದ್ಧತಿಯ ಮೂಲಕ ವಿಚ್ಛೇದನ ನೀಡಿದ್ದಾನೆ ಎನ್ನಲಾಗಿದೆ.
ಈ ಬಗ್ಗೆ ಸಂತ್ರಸ್ತ ಪೇದೆಯು ಹಿರಿಯ ಅಧಿಕಾರಿಗಳಿಗೆ ದೂರು ನೀಡಿದ್ದು, ಮೂರು ವರ್ಷ ಮುಂಚೆ ಮದುವೆಯಾದಾಗಿನಿಂದ ತನ್ನ ಅತ್ತೆಮಾವ ವರದಕ್ಷಿಣೆಗಾಗಿ ಆಗಾಗ್ಗೆ ಕಿರುಕುಳ ನೀಡುತ್ತಿದ್ದ ಬಗ್ಗೆ ಕೂಡ ಹೇಳಿಕೊಂಡಿದ್ದಾಳೆ. ಘಾಜಿಯಾಬಾದ್ನಲ್ಲಿ ನಿಯುಕ್ತಿ ಹೊಂದಿರುವ ಮುಖ್ಯ ಆರೋಪಿ ನಜೀರ್ ಅಹ್ಮದ್ ಮತ್ತು ಮೀರತ್ನ ಪೊಲೀಸ್ ಲೈನ್ಸ್ನಲ್ಲಿ ಕೆಲಸ ಮಾಡುವ ಆತನ ಮಗ ಅಬೀದ್ ವಿರುದ್ಧ ಕೊತ್ವಾಲಿ ಠಾಣೆ ಪೊಲೀಸರು ಕೇಸು ದಾಖಲಿಸಿದ್ದಾರೆ ಎಂದು ಮೀರತ್ ನಗರ ಎಸ್ಪಿ ವಿನೀತ್ ಭಟ್ನಾಗರ್ ತಿಳಿಸಿದ್ದಾರೆ.
