ಟೋಕಿಯೊ ಒಲಿಂಪಿಕ್ಸ್ನ ಕುಸ್ತಿ ಅಖಾಡದಲ್ಲಿ ಭಾರತದ ರವಿ ಕುಮಾರ್ ದಹಿಯಾ ಫೈನಲ್ನಲ್ಲಿ ಚಿನ್ನದ ಪದಕಕ್ಕೆ ಮುತ್ತಿಕ್ಕುವಲ್ಲಿ ವಿಫಲರಾಗಿದ್ದಾರೆ. ಅಂತಿಮ ಹಂತದ ಹೋರಾಟದಲ್ಲಿ ಎರಡು ಬಾರಿ ವಿಶ್ವ ಚಾಂಪಿಯನ್ ರಷ್ಯಾದ ಕುಸ್ತಿಪಟು ಜುರೇವ್ ವಿರುದ್ಧ 7-4 ರಿಂದ ಸೋತು ಬೆಳ್ಳಿ ಪದಕವನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಈ ಮೂಲಕ ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಬೆಳ್ಳಿಗೆ ಮುತ್ತಿಕ್ಕಿದ ಎರಡನೇ ಭಾರತೀಯರಾಗಿದ್ದಾರೆ.
ಪಂದ್ಯದ ಆರಂಭದಲ್ಲಿ, ರಷ್ಯಾದ ಕುಸ್ತಿಪಟು ಜುರೇವ್ ಒಂದೊಂದಾಗಿ ಎರಡು ಅಂಕಗಳನ್ನು ಪಡೆದರು. ಇದರ ನಂತರ, ರವಿ ದಹಿಯಾ ಎದುರಾಳಿ ಕುಸ್ತಿಪಟುವನ್ನು ಸೋಲಿಸುವ ಮೂಲಕ 2 ಅಂಕಗಳನ್ನು ಪಡೆದರು. ಇಬ್ಬರ ನಡುವಿನ ಮೊದಲ ಸುತ್ತಿನ ಅಂತ್ಯದ ನಂತರ, ರಷ್ಯಾದ ಕುಸ್ತಿಪಟು ಮುನ್ನಡೆ ಹೊಂದಿದ್ದರಿಂದ ಮೇಲುಗೈ ಸಾಧಿಸಿದರು.
ಎರಡನೇ ಸುತ್ತಿನಲ್ಲೂ ರಷ್ಯಾದ ಜುರೆವ್ ರವಿ ದಹಿಯಾ ದಾಳಿಯನ್ನು ಸತತವಾಗಿ ವಿಫಲಗೊಳಿಸಿದರು. ಎದುರಾಳಿ ಕುಸ್ತಿಪಟು ಹೆಚ್ಚು ಅಂಕಗಳನ್ನು ಸಂಗ್ರಹಿಸಿದರು. ಇಬ್ಬರ ನಡುವಿನ ಅಂತರ 7-2 ಆಯಿತು. ಅದನ್ನು ಕಡಿಮೆ ಮಾಡುವ ಪ್ರಯತ್ನದಲ್ಲಿ, ರವಿ ದಹಿಯಾ ರಷ್ಯಾದ ಕುಸ್ತಿಪಟುವನ್ನು ಸೋಲಿಸುವ ಮೂಲಕ ಇನ್ನೂ 2 ಅಂಕಗಳನ್ನು ಪಡೆದರು. ಆದರೆ ಮುಂದೆ ಎದುರಾಳಿಯ ಅಂಕವನ್ನು ಹೆಮ್ಮೆಟ್ಟಲು ಸಾಧ್ಯವಾಗದೆ ಬೆಳ್ಳಿ ಪದಕಕ್ಕೆ ಕೊರಳೊಡ್ಡಿದ್ದಾರೆ.