ಲಾಸ್ ಏಂಜಲೀಸ್ : ಪ್ರಯಾಣಿಕನೊಬ್ಬ ಚಲಿಸುತ್ತಿರುವ ವಿಮಾನದಿಂದ ಕೆಳಗೆ ಹಾರಿರುವ ವಿಚಿತ್ರ ಘಟನೆಯೊಂದು ಅಮೆರಿಕದ ಲಾಸ್ ಏಂಜಲೀಸ್ ವಿಮಾನ ನಿಲ್ದಾಣದಲ್ಲಿ ನಡೆದಿದೆ. ಸಾಲ್ಟ್ ಲೇಕ್ ಸಿಟಿಗೆ ಹೊರಟಿದ್ದ ಸ್ಕೈವೆಸ್ಟ್ ಕಂಪೆನಿಯ ಯುನೈಟೆಡ್ ಎಕ್ಸ್ಪ್ರೆಸ್ ವಿಮಾನವು ರಾತ್ರಿ 7 ಗಂಟೆಗೆ ಟೇಕ್ ಆಫ್ಗೆ ಸಿದ್ಧವಾದಂತೆ ಯಾತ್ರಿಯೊಬ್ಬ ವಿಮಾನದಿಂದ ಹೊರಹೋಗಲು ಈ ರೀತಿ ಪ್ರಯತ್ನ ಮಾಡಿದ್ದಾನೆ ಎನ್ನಲಾಗಿದೆ.
ಮೊದಲಿಗೆ ಕಾಕ್ಪಿಟ್ನೊಳಗೆ ಪ್ರವೇಶಿಸಲು ಪ್ರಯತ್ನಿಸಿದ ಈ ಯಾತ್ರಿಯು ನಂತರ ಸರ್ವೀಸ್ ಡೋರನ್ನು ತೆಗೆಯಲು ಸಫಲನಾಗಿ, ಎಮರ್ಜೆನ್ಸಿ ಸ್ಲೈಡ್ನ ಮೂಲಕ ಹಾರಿದ್ದಾನೆ. ತದನಂತರ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಜೀವಕ್ಕೆ ಅಪಾಯವಾಗುವಂಥ ಪೆಟ್ಟು ಬಿದ್ದಿಲ್ಲ ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಘಟನೆಯ ನಂತರ ವಿಮಾನವು ತನ್ನ ಗೇಟಿಗೆ ವಾಪಸಾಗಿ, ಮೂರು ಗಂಟೆಗಳ ನಂತರ ಮತ್ತೆ ಹೊರಟಿತು. ವಿಮಾನದಲ್ಲಿದ್ದ ಮತ್ಯಾರಿಗೂ ಯಾವುದೇ ಪೆಟ್ಟಾಗಿಲ್ಲ ಎಂದು ವಿಮಾನಾಧಿಕಾರಿಗಳು ತಿಳಿಸಿದ್ದಾರೆ. ಸದರಿ ಪ್ರಯಾಣಿಕನು ಆ ರೀತಿಯಾಗಿ ಏಕೆ ವರ್ತಿಸಿದ ಎಂಬುದು ಇನ್ನೂ ಸ್ಪಷ್ಟವಾಗಿ ತಿಳಿದುಬಂದಿಲ್ಲ. ಈ ಘಟನೆಯ ತನಿಖೆಯನ್ನು ಎಫ್ಬಿಐಗೆ ವಹಿಸಲಾಗಿದೆ.
