ಸರಿಯಾದ ಆಹಾರ ಸೇವನೆಯಿಂದ ದೇಹದ ಎಲ್ಲ ರೀತಿಯ ಆರೋಗ್ಯ ಸಮಸ್ಯೆಗಳನ್ನು ನಿಯಂತ್ರಣದಲ್ಲಿ ಇಟ್ಟುಕೊಳ್ಳಬಹುದು. ಅಂತಹ ಆರೋಗ್ಯ ಸಮಸ್ಯೆಗಳ ನಿಯಂತ್ರಣದ ಪಟ್ಟಿಯಲ್ಲಿ ಅಧಿಕ ರಕ್ತದೊತ್ತಡ ಕೂಡ ಒಂದು. ನಿಯಮಿತ ಆಹಾರ ಸೇವನೆಯಿಂದ ಅಪಾಯಕಾರಿ ಅಧಿಕ ರಕ್ತದೊತ್ತಡವನ್ನೂ ಕೂಡ ನಿಯಂತ್ರಣದಲ್ಲಿ ಇಟ್ಟುಕೊಳ್ಳಬಹುದಾಗಿದೆ.
ಸದಾ ಕಾಲ ಔಷಧಗಳನ್ನು ಸೇವಿಸುವುದು ಮಾತ್ರವಲ್ಲ ಆಹಾರ ಪದ್ಧತಿಯೂ ಅದಕ್ಕೆ ಅನುಗುಣವಾಗಿದ್ದರೆ ಹೈಬಿಪಿಯನ್ನು ನಿಯಂತ್ರಿಸಬಹುದು. ರಕ್ತದೊತ್ತಡವು 140/90ಕ್ಕಿಂತ ಜಾಸ್ತಿ ಇದ್ದರೆ ಅದನ್ನು ಅಧಿಕ ರಕ್ತದೊತ್ತಡ ಎಂದು ಪರಿಗಣಿಸಲಾಗುತ್ತದೆ. ಭಾರತದಲ್ಲಿ ಪ್ರತೀ ವರ್ಷ ಲಕ್ಷಾಂತರ ಜನ ಅಧಿಕ ರಕ್ತದೊತ್ತಡ ಸಮಸ್ಯೆಗೆ ಒಳಗಾಗುತ್ತಿದ್ದಾರೆ. ರಕ್ತದ ಒತ್ತಡವು 180/90 ಕ್ಕಿಂತ ಹೆಚ್ಚಾದಾಗ ಅದನ್ನು ಗಂಭೀರ ಸ್ಥಿತಿ ಎಂದು ಹೇಳಲಾಗುತ್ತದೆ.
ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸಬಹುದಾದ ಆಹಾರಗಳ ಬಗ್ಗೆ ಮಾಹಿತಿ ಇಲ್ಲಿದೆ ನೋಡಿ,
ಟೊಮೆಟೋ
ಸಮೃದ್ಧವಾದ ಕ್ಯಾರೊಟಿನಾಯ್ಡ್‌, ಪಿಗ್ಮೆಂಟ್‌, ಲೈಕೋಪೀನ್‌ ಹಾಗೂ ಪೊಟ್ಯಾಸಿಯಂ ಅಂಶಗಳನ್ನು ಟೊಮೆಟೋ ಹಣ್ಣುಗಳು ಹೊಂದಿವೆ. ಲೈಕೋಪೀನ್‌ ಹೃದಯದ ಆರೋಗ್ಯವನ್ನು ಕಾಪಾಡುತ್ತದೆ. ಅಲ್ಲದೆ ಟೊಮೆಟೋದಲ್ಲಿರುವ ಪೋಷಕಾಂಶಗಳು ರಕ್ತದೊತ್ತಡಕ್ಕೆ ಸಂಬಂಧಿಸಿದ ಹೃದ್ರೋಗದ ಅಪಾಯವನ್ನು ಕಡಿಮೆ ಮಾಡುತ್ತದೆ. ಹೀಗಾಗಿ ನಿಮ್ಮ ಆಹಾರದಲ್ಲಿ ಟೊಮೆಟೋ ಬಳಕೆ ಇದ್ದರೆ ಉತ್ತಮ ಎನ್ನುವುದು ತಜ್ಞರ ಸಲಹೆಯಾಗಿದೆ.
ವಿಟಮಿನ್‌ ಸಿ ಅಥವಾ ಸಿಟ್ರಸ್‌ ಹಣ್ಣುಗಳು
ಅಧಿಕ ರಕ್ತದೊತ್ತಡಿಂದ ಬಳಲುತ್ತಿರುವವರು ಕಿತ್ತಳೆ, ನಿಂಬೆಯಂತಹ ಸಿಟ್ರಸ್‌ ಅಂಶವಿರುವ ಹಣ್ಣುಗಳನ್ನು ಹೆಚ್ಚಾಗಿ ಸೇವಿಸಿ. ಈ ಹಣ್ಣುಗಳಲ್ಲಿ ಜೀವಸತ್ವ ಮತ್ತು ಖನಿಜಗಳು ಸಮೃದ್ಧವಾಗಿರುವ ಕಾರಣ ಬಿಪಿಯನ್ನು ನಿಯಂತ್ರಿಸಲು ಹಾಗೂ ಹೃದ್ರೋಗದಂತಹ ಸಮಸ್ಯೆಗಳಿಂದ ದೇಹವನ್ನು ರಕ್ಷಿಸುತ್ತದೆ.
ಸೆಲರಿ ಎಲೆಗಳು
ಪೌಷ್ಟಿಕ ತಜ್ಞ ಬ್ಯಾನರ್ಜಿ ಅವರು ಹೇಳುವ ಪ್ರಕಾರ ಸೆಲರಿ ಎಲೆಗಳು ಕೂಡ ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತವೆ. ಈ ಎಲೆಗಳು ವಿವಿಧ ರೀತಿಯಲ್ಲಿ ಬಳಕೆ ಮಾಡಬಹುದಾಗಿದೆ. ಹೀಗಾಗಿ ಆಹಾರ ಪದ್ಧತಿಯನ್ನು ಸರಿಯಾಗಿ ಇರಿಸಿಕೊಂಡರೆ ರಕ್ತದೊತ್ತಡವನ್ನು ನಿಯಂತ್ರಣದಲ್ಲಿ ಇಡಬಹುದಾಗಿದೆ.
ಜಿಯಾ , ಅಗಸೆ ಬೀಜಗಳು
ಹೇರಳವಾದ ಪೊಟ್ಯಾಸಿಯಂ, ಮೆಗ್ನಿಷಿಯಂ ಮತ್ತು ಫೈಬರ್ ಅಂಶಗಳನ್ನು ಹೊಂದಿರುವ ಚಿಯಾ ಮತ್ತು ಅಗಸೆ ಬೀಜಗಳ ಸೇವನೆಯಿಂದ ದೇಹದಲ್ಲಿನ ಅಧಿಕ ರಕ್ತದೊತ್ತಡವನ್ನು ಸುಲಭವಾಗಿ ನಿಯಂತ್ರಣ ಮಾಡಬಹುದಾಗಿದೆ.
ಇದರ ಜೊತೆಗೆ ಹಸಿರು ತರಕಾರಿಗಳ ಸೇವನೆ, ಜಂಕ್‌ ಫುಡ್‌ಗಳನ್ನು ತ್ಯಜಿಸುವುದು ಮತ್ತು ಪ್ರತಿದಿನ ವ್ಯಾಯಾಮ ಮಾಡುವುದರಿಂದ ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸಬಹುದಾಗಿದೆ.
ಬ್ರೋಕೊಲಿಯ ಬಳಕೆ
ಕೋಸುಗಡ್ಡೆ ಅಥವಾ ಬ್ರೊಕೊಲಿಯು ಉತ್ಕರ್ಷಣ ನಿರೋಧಕ ಮತ್ತು ಫ್ಲೇವನಾಯ್ಡ್‌ಗಳನ್ನು ಹೊಂದಿದೆ. ಇದು ರಕ್ತನಾಳಗಳ ಕಾರ್ಯವನ್ನು ಮತ್ತು ದೇಹದಲ್ಲಿ ನೈಟ್ರಿಕ್‌ ಆಸಿಡ್‌ ಮಟ್ಟವನ್ನು ಹೆಚ್ಚಿಸುವ ಮೂಲಕ ಅಧಿಕ ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ.
ಕ್ಯಾರೆಟ್‌ ಸೇವನೆ
ಕ್ಲೊರೊಜೆನಿಕ್‌, ಪಿ ಕುಮರಿಕ್‌ ಮತ್ತು ಕೆಫೀಕ್‌ ಆಮ್ಲದಂತಹ ಫೀನಾಲಿಕ್‌ ಅಂಶಗಳು ಅಡಕವಾಗಿದೆ. ಇದು ರಕ್ತನಾಳಗಳನ್ನು ಸಡಿಲಗೊಳಿಸುತ್ತದೆ. ಜೊತೆಗೆ ಊತವನ್ನು ಕಡಿಮೆ ಮಾಡುತ್ತದೆ. ಈ ಮೂಲಕ ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸುತ್ತದೆ.
ಕ್ಯಾರೆಟ್‌ ಜ್ಯೂಸ್‌ ಅಥವಾ ಹಸಿಯಾಗಿಯೂ ಕ್ಯಾರೆಟ್‌ನ್ನು ಸೇವಿಸಬಹುದಾಗಿದೆ. ಇದು ಕಣ್ಣಿನ ಆರೋಗ್ಯಕ್ಕೂ ಒಳ್ಳೆಯದು.
ಪಿಸ್ತಾ
ಅಧಿಕ ರಕ್ತದೊತ್ತಡ ಇರುವವರಿಗೆ ಪಿಸ್ತಾ ಹೆಚ್ಚು ಉಪಯುಕ್ತವಾಗಿದೆ. ಇದು ಹೃದಯಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ಪೂರೈಸುತ್ತದೆ. ಹೀಗಾಗಿ ರಕ್ತಸಂಚಾರ ಸುಲಲಿತವಾಗಿ ಅಗುತ್ತದೆ. ಪಿಸ್ತಾ ದೇಹಕ್ಕೆ ಅಗತ್ಯವಾದ ಪ್ರೋಟೀನ್‌ ಅಂಶಗಳನ್ನು ಒದಗಿಸುತ್ತದೆ. ಮೂಳೆಗಳ ಬಲವರ್ಧನೆಗೂ ಇದು ಸಹಾಯಕವಾಗಿದೆ.
ಕುಂಬಳಕಾಯಿ ಬೀಜಗಳು
ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸುವ ಆಹಾರಗಳಲ್ಲಿ ಕುಂಬಳಕಾಯಿಯ ಬೀಜಗಳು ಮಹತ್ವದ ಪಾತ್ರವಹಿಸುತ್ತವೆ. ಈ ಬೀಜಗಳಲ್ಲಿರುವ ಫೈಬರ್ ಅಂಶವು ದೇಹಕ್ಕೆ ಅಗತ್ಯ ಪೋಷಕಾಂಶಗಳನ್ನು ಪೂರೈಸುತ್ತದೆ. ರಕ್ತದ ಹರಿವನ್ನು ಕೂಡ ಸುಧಾರಿಸುತ್ತದೆ. ಈ ಮೂಲಕ ಹೈಪರ್‌ ಟೆನ್ಷನ್‌ನ್ನು ನಿಯಂತ್ರಿಸಲು ಇವು ಉಪಯುಕ್ತವಾಗಿವೆ.
ಸಾಲ್ಮನ್‌, ಕೊಬ್ಬಿನ ಮೀನು
ಅಧಿಕ ಬಿಪಿ ಇರುವವರು ಕೊಬ್ಬಿನ ಮೀನು ಮತ್ತು ಸಾಲ್ಮನ್‌ಗಳನ್ನು ಸೇವಿಸುವಂತೆ ತಜ್ಞರು ಸಲಹೆ ನೀಡುತ್ತಾರೆ. ಒಮೆಗಾ 3 ಕೊಬ್ಬಿನಾಮ್ಲಗಳು ಕೊಬ್ಬಿನ ಮೀನುಗಳಲ್ಲಿ ಉತ್ತಮ ಪ್ರಮಾಣದಲ್ಲಿರುತ್ತವೆ. ಇದು ಹೃದಯದ ಆರೋಗ್ಯವನ್ನು ಕಾಪಾಡುವಲ್ಲಿ ಮಹತ್ವದ ಪಾತ್ರವಹಿಸುತ್ತದೆ.
