ಪ್ರಕೃತಿಯು ನಮಗೆ ಆರೋಗ್ಯಕರವಾಗಿ ಜೀವನ ನಡೆಸಲು ಭೂಮಿ ಮೇಲೆ ಪ್ರತಿಯೊಂದನ್ನು ನೀಡಿದೆ. ನೈಸರ್ಗಿಕವಾಗಿ ಸಿಗುವ ಹಸಿರೆಲೆ ಸೊಪ್ಪುಗಳು ತರಕಾರಿಗಳು, ಹಣ್ಣುಹಂಪಲುಗಳು, ಬೇಳೆ ಕಾಳುಗಳು, ಕಡಲೆಕಾಳುಗಳು ಅಥವಾ ಧ್ಯಾನ್ಯಗಳು ಆಗಿರಬಹುದು. ಪ್ರತಿಯೊಂದು ಕೂಡ ನಮ್ಮ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು.
ಆದರೆ ಇಂದಿನ ದಿನಗಳಲ್ಲಿ ನಾವು ನೈಸರ್ಗಿಕವಾಗಿ ಸಿಗುವ ಆಹಾರವನ್ನು ಕಡೆಗಣಿಸಿ ಸಂಸ್ಕರಿತ ಹಾಗೂ ರೆಡಿಮೇಡ್ ಆಹಾರದ ಮೊರೆ ಹೋಗುತ್ತೇವೆ. ಇದರಿಂದ ನಮ್ಮ ಆರೋಗ್ಯ ಹಾಳಾಗುವುದು ಮಾತ್ರವಲ್ಲದೆ, ಅನಾರೋಗ್ಯಕಾರಿ ಸಮಸ್ಯೆಗಳು ಕೂಡ ಕಾಡುವುದು. ಹೀಗಾಗಿ ಸರಿಯಾದ ಆಹಾರ ಪದ್ಧತಿಯನ್ನು ಅನುಸರಿಸಿಕೊಂಡು, ಜೀವನ ಸಾಗಿಸಿದರೆ ಖಂಡಿತವಾಗಿಯೂ ಯಾವುದೇ ಸಮಸ್ಯೆಯು ಬಾರದು. ಬನ್ನಿ ಇಂದಿನ ಲೇಖನದಲ್ಲಿ ಹಲವಾರು ಬಗೆಯ ಪೌಷ್ಟಿಕ ಸತ್ವಗಳ ಜೊತೆಗೆ ಅಧಿಕ ಪ್ರಮಾಣದಲ್ಲಿ ಪ್ರೋಟೀನ್ ಅಂಶ ಒಳಗೊಂಡಿರುವ ಕಾಬುಲ್ ಕಡಲೆಕಾಳ ಆರೋಗ್ಯಕಾರಿ ಪ್ರಯೋಜನಗಳು ಏನೆಲ್ಲಾ ಎನ್ನುವುದನ್ನು ನೋಡೋಣ.
ಕಾಬುಲ್ ಕಡಲೆಕಾಳುಗಳು
ಕಾಬುಲ್ ಕಡಲೆಕಾಳನ್ನು ಹಾಕಿ ಮಾಡಿದ, ತೊಂಡೆಕಾಯಿಲ ಪಲ್ಯ, ಇಲ್ಲಾಂದ್ರೆ ಆಲೂಗಡ್ಡೆ ಜೊತೆಗೆ ಕಾಬುಲ್ ಕಡಲೆಕಾಳುಗಳನ್ನು ಹಾಕಿ ಮಾಡುವ ಸಾಂಬರ್, ಇಲ್ಲಾಂದ್ರೆ ಚಪಾತಿ ಅಥವಾ ಪೂರಿ ಜೊತೆಗೆ ಸೇವಿಸಲು, ಕಾಬೂಲ್ ಕಡಲೆಕಾಳುಗಳನ್ನು ಬಳಸಿ ಮಾಡುವ ಚೋಲೆ ಮಸಾಲೆ, ಹೀಗೆ ಹಲವಾರು ಅಡುಗೆ ಗಳಲ್ಲಿ ಇವುಗಳನ್ನು ಬಳಕೆ ಮಾಡಲಾಗುತ್ತದೆ.
ಮುಖ್ಯವಾಗಿ ಈ ಕಡಲೆಕಾಳುಗಳಲ್ಲಿ ಹಲವಾರು ಬಗೆಯ ಪೌಷ್ಟಿಕ ಸತ್ವಗಳು ಇರುವುದರ ಜೊತೆಗೆ, ಅಧಿಕ ಪ್ರಮಾಣದಲ್ಲಿ ಪ್ರೋಟೀನ್ ಅಂಶಗಳು ಕೂಡ ಕಂಡು ಬರುತ್ತದೆ. ಅಷ್ಟೇ ಅಲ್ಲದೆ ಇದರಲ್ಲಿ ವಿಟಮಿನ್ ಸಿ ಅಂಶ ಕೂಡ ಅಧಿಕ ಪ್ರಮಾಣದಲ್ಲಿ ಕಂಡು ಬರುವುದರಿಂದ, ದೇಹದ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಕೂಡ ನೆರವಾಗುತ್ತದೆ.
ಇದರ ಜೊತೆಗೆ ಈ ಕಡಲೆಕಾಳುಗಳಲ್ಲಿ ವಿಟಮಿನ್ ಬಿ6, ಫೋಲೇಟ್, ಮ್ಯಾಂಗನೀಸ್, ಕ್ಯಾಲ್ಸಿಯಂ, ನಾರಿನಾಂಶ, ಕಬ್ಬಿಣಾಂಶ , ಪೊಟ್ಯಾಶಿಯಂ ಮತ್ತು ಮೆಗ್ನೀಸಿಯಮ್ ಅಂಶಗಳು ಕೂಡ ಹೇರಳವಾಗಿ ಸಿಗುವುದರಿಂದ, ದೇಹದ ಆರೋಗ್ಯ ವೃದ್ಧಿಸುವಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ.
ಮಧುಮೇಹ ಇರುವ ರೋಗಿಗಳಿಗೆ
ಕಾಬುಲ್ ಕಡಲೆ ಕಾಳುಗಳಲ್ಲಿ ಕಡಿಮೆ ಪ್ರಮಾಣದಲ್ಲಿ ಗ್ಲೈಸೆಮಿಕ್ ಸೂಚ್ಯಂಕ ಕಂಡು ಬರುವ ಜೊತೆಗೆ ಕಾರ್ಬೋಹೈಡ್ರೇಟ್ ಅಂಶ ಕೂಡ ಕಡಿಮೆ ಪ್ರಮಾಣದಲ್ಲಿ ಕಂಡು ಬರುತ್ತದೆ.
ಹೀಗಾಗಿ ರಕ್ತದಲ್ಲಿ ಸಕ್ಕರೆ ಪ್ರಮಾಣ ದಿಢೀರಣೆ ಏರಿಕೆಯಾಗದಂತೆ ತಡೆದು ಮಧುಮೇಹ ರೋಗ ಕೈ ಮೀರಿ ಹೋಗದಂತೆ ನೋಡಿಕೊಳ್ಳುತ್ತದೆ.
ಹೀಗಾಗಿ ಮಧುಮೇಹ ಕಾಯಿಲೆ ಇರುವವರು ತಮ್ಮ ಆಹಾರ ಕ್ರಮದಲ್ಲಿ ಕಾಬುಲ್ ಕಡಲೆಕಾಳು ಗಳನ್ನು ಸೇವನೆ ಮಾಡಿಕೊಳ್ಳಬಹುದು. ಇದರಿಂದ ದೇಹದಲ್ಲಿ ಅಧಿಕಗೊಂಡಿರುವ ಸಕ್ಕರೆ ಪ್ರಮಾಣ ವನ್ನು ಸಂಪೂರ್ಣವಾಗಿ ನಿಯಂತ್ರಣಕ್ಕೆ ತಂದುಕೊಳ್ಳಲು ನೆರವಾಗುತ್ತದೆ.
ತೂಕ ಇಳಿಸುವವರಿಗೆ
ಮೊದಲೇ ಹೇಳಿದಂತೆ ಈ ಕಡಲೆಕಾಳಿನಲ್ಲಿ ಅಧಿಕ ಪ್ರಮಾಣದಲ್ಲಿ ಪೌಷ್ಟಿಕ ಸತ್ವಗಳ ಜೊತೆಗೆ ಪ್ರೋಟೀನ್ ಅಂಶಗಳು ಕೂಡ ಯಥೇಚ್ಛವಾಗಿದೆ. ಇದರಿಂದಾಗಿ ತೂಕ ಇಳಿಸುವವರಿಗೆ ಈ ಕಡಲೆ ಕಾಳುಗಳು ಸಹಾಯಕ್ಕೆ ಬರುತ್ತದೆ.
ಇನ್ನು ಮುಖ್ಯವಾಗಿ ಕಾಬುಲ್ ಕಡಲೆ ಕಾಳುಗಳಲ್ಲಿ ನಾರಿನಾಂಶ ಕೂಡ, ಸ್ವಲ್ಪ ಹೆಚ್ಚಿನ ಪ್ರಮಾಣ ದಲ್ಲಿ ಕಂಡುಬರುವುದರಿಂದ, ಪದೇ ಪದೇ ಆಹಾರ ತಿನ್ನಬೇಕು ಅನಿಸುವುದಿಲ್ಲ, ಹೊಟ್ಟೆ ತುಂಬಿದಂತೆ ಅನುಭವ ನೀಡುತ್ತದೆ. ಇದರಿಂದ ದೇಹದ ತೂಕ ಇಳಿಸುವವರಿಗೆ ಸಹಾಯಕವಾಗಲಿದೆ.
ಹೃದಯದ ಆರೋಗ್ಯಕ್ಕೆ
ಹೃದಯದ ಆರೋಗ್ಯಕ್ಕೂ ಈ ಕಾಬುಲ್ ಕಡಲೆಕಾಳುಗಳು, ಒಳ್ಳೆಯದು ಎಂದರೆ ನಿಜಕ್ಕೂ ಖುಷಿ ಆಗುತ್ತದೆ. ಇದಕ್ಕೆ ಮುಖ್ಯ ಕಾರಣ, ಈ ಕಾಬುಲ್ ಕಡಲೆ ಕಾಳುಗಳಲ್ಲಿ, ಹೃದಯದ ಆರೋಗ್ಯಕ್ಕೆ ಸ್ನೇಹಿ ಆಗಿರುವ ಪೊಟ್ಯಾಶಿಯಂ ಅಂಶಗಳು.
ಇದರ ಜೊತೆಗೆ ಈ ಕಡಲೆ ಕಾಳಿನಲ್ಲಿ ವಿಟಮಿನ್ ಸಿ, ನಾರಿನಾಂಶ ಹಾಗೂ ವಿಟಮಿನ್ ಬಿ6 ಕೂಡ ಯಥೇಚ್ಛವಾಗಿ ಸಿಗುವುದರಿಂದ ಹೃದಯದ ಆರೋಗ್ಯಕ್ಕೆ ಇದೊಂದು ಹೇಳಿ ಮಾಡಿಸಿದ ಆಹಾರ ಎನ್ನುವುದರಲ್ಲಿ ಎರಡು ಮಾತಿಲ್ಲ.
ಕೆಟ್ಟ ಕೊಲೆಸ್ಟ್ರಾಲ್ ಅಂಶ ಹೆಚ್ಚಾಗದಂತೆ ನೋಡಿಕೊಳ್ಳುತ್ತದೆ…
ರಕ್ತದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಅಂಶಗಳು ಹೆಚ್ಚಾಗುತ್ತಾ ಹೋದಂತೆ, ಕೊನೆಗೆ ಹೃದಯಕ್ಕೆ ಸಂಬಂಧ ಪಟ್ಟ ಸಮಸ್ಯೆಗಳು ಬರುವ ಅಪಾಯ ಹೆಚ್ಚಿರುತ್ತದೆ. ಹೀಗಾಗಿ ದೇಹದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಅಂಶ ಹೆಚ್ಚಾಗದಂತೆ ನೋಡಿಕೊಳ್ಳಬೇಕು. ಇದಕ್ಕಾಗಿ ಕಾಬುಲ್ ಕಡಲೆಕಾಳುಗಳನ್ನು ಸೇರಿಸಿ ಕೊಂಡರೆ ಬಹಳ ಒಳ್ಳೆಯದು.
ಇವು ರಕ್ತದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಮಟ್ಟವನ್ನು ತಗ್ಗಿಸಿ ರಕ್ತ ನಾಳಗಳಲ್ಲಿ ಶೇಖರಣೆ ಆಗುವ ಕಟ್ಟ ಕೊಬ್ಬಿನಾಂಶಗಳನ್ನು ಕಡಿಮೆ ಮಾಡುವುದು ಮಾತ್ರವಲ್ಲದೆ ಅಪಧಮನಿಗಳಲ್ಲಿ ರಕ್ತ ಹೆಪ್ಪು ಗಟ್ಟದಂತೆ ನೋಡಿಕೊಂಡು, ಹೃದಯದ ಆರೋಗ್ಯಕ್ಕೆ ಯಾವುದೇ ತೊಂದರೆಗಳು ಬರದಂತೆ ನೋಡಿಕೊಳ್ಳುವ ಒಳ್ಳೆಯ ಗುಣಲಕ್ಷಣಗಳು ಈ ಕಾಬುಲ್ ಕಡಲೆ ಕಾಳುಗಳಿಗೆ ಇದೆ.
