ಬೆಂಗಳೂರು: ಇತ್ತೀಚೆಗೆ ವರದಕ್ಷಿಣೆ ಕಿರುಕುಳ ಪ್ರಕರಣಗಳು ಹೆಚ್ಚಾಗಿ ಕಂಡುಬರುತ್ತಿವೆ. ಕೋರಮಂಗಲದಲ್ಲಿ ಐಟಿ ಕಂಪನಿ ಉದ್ಯೋಗಿಯೊಬ್ಬ ತನ್ನ ಹೆಂಡತಿಗೆ ಕಿರುಕುಳ ನೀಡಿದ್ದಾನೆ. ಅದೂ ಸಹ ಮದ್ಯದ ಜೊತೆಗೆ ಡ್ರಗ್ಸ್ ಸೇವಿಸಿ. ತನ್ನ ಪತ್ನಿ ಎದುರಲ್ಲೇ ಮಾದಕವಸ್ತು ಸೇವನೆ ಮಾಡಿ ವರದಕ್ಷಿಣೆ ತರುವಂತೆ ಆಕೆಗೆ ಚಿತ್ರಹಿಂಸೆ ನೀಡುತ್ತಿದ್ದ ಎಂದು ತಿಳಿದು ಬಂದಿದೆ.
ತನ್ನ ಡ್ರಗ್ ಚಟವನ್ನು ಹೆಂಡತಿಗೆ ವಿಡಿಯೋ ಮಾಡುವಂತೆ ಹೇಳಿ ವಿಕೃತಿಯನ್ನೂ ಮೆರೆದಿದ್ದಾನೆ. ಗಂಡನ ಮಾತಿಗೆ ಹೆದರಿದ ಹೆಂಡತಿ ಮೊಬೈಲ್ನಲ್ಲಿ ವಿಡಿಯೋ ಮಾಡಿದ್ದಾಳೆ. ಟೆಕ್ಕಿ ತನ್ನ ಮೊಬೈಲ್ ಮೇಲೆ ಡ್ರಗ್ಸ್ ಹಾಕಿಕೊಂಡು ಸೇವಿಸುತ್ತಿದ್ದ ದೃಶ್ಯ ಹೆಂಡತಿಯ ಮೊಬೈಲ್ನಲ್ಲಿ ಸೆರೆಯಾಗಿದೆ.
ಕೋರಮಂಗಲದ ಲೋಹಿತ್ ಎಂಬಾತ ಈ ಕೃತ್ಯ ಎಸಗಿದ್ದಾನೆ. ಈತ ಐಟಿ ಕಂಪನಿಯ ಉದ್ಯೋಗಿ ಎಂದು ತಿಳಿದು ಬಂದಿದೆ. ಡ್ರಗ್ಸ್ ಸೇವನೆ ಜೊತೆಗೆ ಆತ ತನ್ನ ಹೆಂಡತಿಗೆ ಮಾದಕ ವಸ್ತುವಿನ ಬಗ್ಗೆ ವಿವರಣೆ ಕೊಡುತ್ತಿದ್ದ ಎನ್ನಲಾಗಿದೆ. ಆರೋಪಿ ಲೋಹಿತ್ ಥಣಿಸಂದ್ರ ಬಳಿ ಕೊಕೈನ್ನ್ನು ತರುತ್ತಿದ್ದ ಎಂಬ ಮಾಹಿತಿ ಪೊಲೀಸರಿಗೆ ಲಭಿಸಿದೆ. ಇನ್ನು ಗಂಡನ ಕಿರುಕುಳದ ವಿರುದ್ದ ಪತ್ನಿ ಮಹಿಳಾ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಈ ಸಂಬಂಧ ಪೂರ್ವ ವಿಭಾಗದ ಮಹಿಳಾ ಠಾಣೆಯಲ್ಲಿ ದೂರು ದಾಖಲಾಗಿದೆ.
