ಮಂಗಗಳನ್ನು ಕಂಡರೆ ಜನ ಕಲ್ಲು ಹೊಡೆಯುವುದು, ಪಟಾಕಿ ಹಚ್ಚಿ ಬೆದರಿಸುವುದು ಸಾಮಾನ್ಯ ಕಪಿಗಳ ಉಪಟಳ ಹೆಚ್ಚಿದಾಗಲೆಲ್ಲ ಜನರು ರೊಚ್ಚಿಗೆದ್ದವರಂತೆ ವರ್ತಿಸಿ ಕ್ರೂರತೆಯನ್ನು ಮೆರೆಯುತ್ತಲೇ ಇರುತ್ತಾರೆ. ಆದರೆ, ಇಲ್ಲೊಬ್ಬರು ಮಹಿಳೆ ಈ ಮಂಗಗಳನ್ನೇ ತಮ್ಮ ಸ್ವಂತ ಮಕ್ಕಳಿಗಿಂತ ಹೆಚ್ಚಾಗಿ ಸಾಕುತ್ತಿದ್ದಾರೆ. 3 ಪುಟಾಣಿ ಕೋತಿ ಮರಿಗಳಿಗೆ ಬಾಟಲ್ ಫೀಡಿಂಗ್ ಮೂಲಕ ಹಾಲುಣಿಸುತ್ತಿರುವ ವಿಡಿಯೋ ಜನರ ಮೆಚ್ಚುಗೆ ಗಳಿಸಿದೆ.
ಗಹ್ಲೌತ್ ಮನೀಶ್ ಎಂಬ ಟ್ವಿಟರ್ ಬಳಕೆದಾರರೊಬ್ಬರು ಈ ಚೆಂದದ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ಮಹಿಳೆ ಕೋತಿ ಮರಿಗಳಿಗೆ ಹಾಲುಣಿಸುತ್ತಿರುವುದು ಕಾಣಸಿಗುತ್ತದೆ. ಹಸಿದುಕೊಂಡಿರುವ ಪುಟಾಣಿ ಮರಿಗಳು ಮಹಿಳೆಯನ್ನೇ ಸುತ್ತುವರಿದು ಹಾಲು ನೀಡುವಂತೆ ಪೀಡಿಸುತ್ತಿರುವ ಈ ವಿಡಿಯೋ ಎಂಥವರ ಮುಖದಲ್ಲೂ ಮಂದಹಾಸ ಮೂಡಿಸುತ್ತದೆ.
Sure to make you happy!!! pic.twitter.com/meiTeuJTeq
— Flotsam&Jetsam Diaries (@GahlautManish) October 8, 2020
ಇಲ್ಲಿ 3 ಕೋತಿ ಮರಿಗಳಿಗೂ ಚಿಕ್ಕ ಮಕ್ಕಳಿಗೆ ತೊಡಿಸುವಂತೆ ಡೈಪರ್ ಹಾಗೂ ಟಿ-ಶರ್ಟ್ ತೊಡಿಸಲಾಗಿದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಮಹಿಳೆಯ ಮಾತೃ ಹೃದಯಕ್ಕೆ ನೆಟ್ಟಿಗರು ಮನಸೋತು ಮೆಚ್ಚುಗೆ ವ್ಯಕ್ತ ಪಡಿಸುತ್ತಿದ್ದಾರೆ. ವಿಡಿಯೋದಲ್ಲಿನ ಮಹಿಳೆಯ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಾಗಿಲ್ಲ.