ಅನಾದಿ ಕಾಲದಿಂದಲೂ ಕೂಡ ಹಚ್ಚೆ ಹಾಕಿಸಿಕೊಳ್ಳುವ ಸಂಪ್ರದಾಯ ರೂಢಿಯಲ್ಲಿದೆ. ಆದರೆ ಇಂದಿನ ಕಾಲದಲ್ಲಿ ಅದು ರಾಸಾಯನಿಕಯುಕ್ತ ಪದಾರ್ಥಗಳ ಬಳಕೆ ಮಾಡಿ ಹಾಕಿಸಿಕೊಳ್ಳುವ ಟ್ಯಾಟೂ ಆಗಿದೆ. ಇತ್ತಿಚಿನ ದಿನಗಳಲ್ಲಂತೂ ಯುವ ಜನರಲ್ಲಿ ಟ್ಯಾಟೂ ಹುಚ್ಚು ಜೋರಾಗಿಯೇ ಇದೆ. ದೇಹದ ವಿವಿಧ ಭಾಗಗಳಲ್ಲಿ ನಾನಾ ವಿನ್ಯಾಸದ ಟ್ಯಾಟೂಗಳನ್ನು ಹಾಕಿಕೊಳ್ಳುವ ಮೂಲಕ ಸುಂದರತೆಯನ್ನು ಕಾಣುವುದನ್ನು ನೋಡಬಹುದಾಗಿದೆ.
ಆರೋಗ್ಯ ಇಲಾಖೆಯ ಅಧ್ಯಯನ ಪ್ರಕಾರ ಪ್ರತೀ ವರ್ಷ ಸುಮಾರು 15 ಶೇ.ರಷ್ಟು ಜನರು ಹಚ್ಚೆ ಹಾಕಿಸಿಕೊಂಡ ನಂತರ ಜಾಂಡೀಸ್‌ನಿಂದ ಬಳಲುತ್ತಿದ್ದಾರೆ. ಇದು ಮಾರಣಾಂತಿಕ ಕಾಯಿಲೆಗಳಿಗೂ ಕಾರಣವಾಗಬಹುದು. ಜಾತ್ರೆಗಳಲ್ಲಿ, ಅಧಿಕೃತತೆ ಇಲ್ಲದ ಅಂಗಡಿಗಳಲ್ಲಿ ಟ್ಯಾಟೂ ಹಾಕಿಸಿಕೊಳ್ಳುವುದರಿಂದ ಅವರು ಒಬ್ಬಿರಿಗೆ ಚುಚ್ಚಿದ ಸೂಜಿಯನ್ನೇ ಮತ್ತೊಬ್ಬರಿಗೆ ಚುಚ್ಚುವ ಮೂಲಕ ರೋಗ ಹರಡಲು ಕಾರಣವಾಗುತ್ತಿದೆ.
ಹಾಗಾದರೆ ಸರಿಯಾದ ಕ್ರಮದಲ್ಲಿ ಟ್ಯಾಟೂ ಹಾಕಿಸಿಕೊಳ್ಳದಿದ್ದರೆ ಯಾವೆಲ್ಲ ರೀತಿಯ ಆರೋಗ್ಯ ಸಮಸ್ಯೆಗಳು ಕಾಡುತ್ತವೆ, ಹೇಗೆ ಆರೈಕೆ ಮಾಡಬೇಕು, ಅಪಾಯಗಳೇನು ಎನ್ನುವ ಬಗ್ಗೆ ನೀವು ತಿಳಿದುಕೊಳ್ಳಲೇಬೇಕು. ಆ ಬಗ್ಗೆ ಇಲ್ಲಿದೆ ನೋಡಿ ಮಾಹಿತಿ.
ಟ್ಯಾಟೂ ಹಾಕಿಸಿಕೊಳ್ಳುವ ಮುನ್ನ ಈ ಅಂಶಗಳು ನೆನಪಿರಲಿ
ನೀವೇನಾದ್ರೂ ಟ್ಯಾಟೂ ಹಾಕಿಸಿಕೊಳ್ಳುವ ಯೋಚನೆ ಮಾಡಿದ್ದರೆ ಮಧ್ಯಪಾನ ಮತ್ತು ಧೂಮಪಾನದ ಅಭ್ಯಾಸಗಳಿಂದ ದೂರವಿರಿ. ಏಕೆಂದರೆ ಇದರಿಂದ ಟ್ಯಾಟೂ ಹಾಕುವ ವೇಳೆ ರಕ್ತಸ್ರಾವವಾಗುವ ಸಾಧ್ಯತೆ ಇರುತ್ತದೆ. ಚರ್ಮದ ಆರೋಗ್ಯವನ್ನು ಉತ್ತಮವಾಗಿಟ್ಟುಕೊಳ್ಳಲು ಸಾಕಷ್ಟು ನೀರು ಕುಡಿಯಿರಿ. ಇದರಿಂದ ನಿಮ್ಮ ಚರ್ಮ ಮೃದುವಾಗಿರುತ್ತದೆ. ಸೂಜಿ ಚುಚ್ಚಿದಾಗಲೂ ಹೆಚ್ಚು ನೋವಾಗುವುದಿಲ್ಲ.
ಟ್ಯಾಟೂ ಹಾಕಿಸಿಕೊಳ್ಳುವಾಗ ಸರಿಯಾಗಿ ತರಬೇತಿ ಪಡೆದವರಲ್ಲಿಯೇ ಹಾಕಿಸಿಕೊಳ್ಳಿ. ಇಲ್ಲವಾದರೆ ಕಾಯಿಲೆಗಳು ಹರಡಬಹುದು. ಸೂಜಿ ಬದಲಿಸಿದೇ ಟ್ಯಾಟೂ ಹಾಕಿದ್ದರೆ ಅಥವಾ ಚರ್ಮಕ್ಕೆ ಶಾಯಿ ಹೊಂದಾಣಿಯಾಗಿರದಿದ್ದರೆ ಈ ರೋಗಗಳು ಕಾಡಬಹುದು.
ಚರ್ಮ ರೋಗಗಳು
ಹಚ್ಚೆ ಹಾಕುವಾಗ ಬಳಸುವ ಇಂಕ್‌ ಚರ್ಮವನ್ನು ಹಾಳು ಮಾಡಬಹುದು. ಅಲ್ಲದೆ ಇದರಿಂದ ಚರ್ಮದ ಅಲರ್ಜಿ, ಚರ್ಮ ರೋಗಗಳು ಬರುವ ಸಾಧ್ಯತೆಗಳು ಇರುತ್ತವೆ. ಆದ್ದರಿಂದ ಮುನ್ನೆಚ್ಚರಿಕೆ ಕ್ರಮ ಮತ್ತು ಟ್ಯಾಟೂ ಹಾಕಿದ ಬಳಿಕ ಜಾಗದಲ್ಲಿ ಚರ್ಮವನ್ನು ಹೇಗೆ ರಕ್ಷಿಸಿಕೊಳ್ಳಬೇಕು ಎನ್ನುವ ಬಗ್ಗೆ ತಿಳಿದಿರಬೇಕು.
ಟ್ಯಾಟೂ ಡೈಗಳು ಕೆಂಪು, ಹಸಿರು, ಹಳದಿ ಮತ್ತು ನೀಲಿ ಬಣ್ಣಗಳಲ್ಲಿ ಇರಬಹುದು. ಟ್ಯಾಟೂ ಸೈಟ್‌ನಲ್ಲಿ ತುರಿಕೆ ರಾಶ್‌ನಂತಹ ಅಲರ್ಜಿಯ ಚರ್ಮದ ಪ್ರತಿಕ್ರಿಯೆಗಳನ್ನು ಉಂಟುಮಾಡಬಹುದು. ನೀವು ಹಚ್ಚೆ ಹಾಕಿದ ವರ್ಷಗಳ ನಂತರವೂ ಇದು ಸಂಭವಿಸಬಹುದು.
ರಕ್ತದಿಂದ ಹರಡುವ ರೋಗಗಳು
ಹಚ್ಚೆ ರಚಿಸಲು ಬಳಸುವ ಉಪಕರಣವು ಸೋಂಕಿತ ರಕ್ತದಿಂದ ಕಲುಷಿತವಾಗಿದ್ದರೆ, ನೀವು ಮೆಥಿಸಿಲಿನ್-ನಿರೋಧಕ ಸ್ಟ್ಯಾಫಿಲೋಕೊಕಸ್ ಔರೆಸ್ (MRSA), ಹೆಪಟೈಟಿಸ್ ಬಿ ಮತ್ತು ಹೆಪಟೈಟಿಸ್ ಸಿ ಸೇರಿದಂತೆ ವಿವಿಧ ರಕ್ತಸಂಬಂಧಿ ಕಾಯಿಲೆಗಳಿಗೆ ಒಳಗಾಗಬಹುದು.
ಅಲ್ಲದೆ ಟ್ಯಾಟೂಗೆ ಬಳಸುವ ಶಾಹಿಯು ರಕ್ತಕ್ಕೆ ಸೇರಿ ತುರಿಕೆ, ರಾಶಸ್‌ಗಳು ಸೇರಿದಂತೆ ರಕ್ತವನ್ನು ಕಲುಷಿತಗೊಳಿಸಿ ಮಾರಣಾಂತಿಕ ರೋಗ ಉಂಟಾಗಲು ಕಾರಣವಾಗಬಹುದು.
ಟ್ಯಾಟೂ ಹಾಕಿದ ನಂತರ ಕಾಳಜಿ ಹೀಗಿರಲಿ
ಒಮ್ಮೆ ಟ್ಯಾಟೂ ಹಾಕಿಸಿಕೊಂಡ ಬಳಿಕ ಹೆಚ್ಚು ನೀರನ್ನು ತಾಗಿಸಬೇಡಿ. ಸೋಂಕು ಹರಡುವ ಸಾಧ್ಯತೆಗಳಿರುತ್ತದೆ. ಆದಷ್ಟು ಗಾಳಿ ಆಡಲು ಬಿಡಿ. ಗಾಳಿ ಸಿಕ್ಕಷ್ಟು ಬೇಗ ಗಾಯ ಮತ್ತು ನೋವು ವಾಸಿಯಾಗುತ್ತದೆ.
ಟ್ಯಾಟೂಗೆ ಹಾಕಿದ ಬ್ಯಾಂಡೇಜ್‌ನ್ನು ತೆಗೆದು ಸ್ವಚ್ಛಗೊಳಿಸುವಾಗ ಆಂಟಿ ಬ್ಯಾಟಕ್ಟೀರಿಯಲ್‌ ಪದಾರ್ಥಗಳನ್ನು ಬಳಸಿ. ಟ್ಯಾಟೂವನ್ನು ಉಗುರು ಬೆಚ್ಚಗಿನ ನೀರಿನಿಂದ ತೊಳೆಯರಿ. ನೆನಪಿಡಿ ಒಣ ಬಟ್ಟೆಯಲ್ಲಿ ನೀರು ಸಂಪೂರ್ಣವಾಗಿ ಆರುವಂತೆ ಒರೆಸಿಕೊಳ್ಳಿ.
ಆದಷ್ಟು ಚರ್ಮ ಮಾಶ್ಚರೈಸ್‌ ಆಗಿರುವಂತೆ ನೋಡಿಕೊಳ್ಳಿ. ಬಾಡಿ ಲೊಷನ್‌ ಅಥವಾ ಪೆಟ್ರೋಲಿಯಂ ಜೆಲ್ಲಿಯನ್ನು ಹಚ್ಚಿಕೊಳ್ಳಿ. ಆದಷ್ಟು ಸೂರ್ಯನ ಬಿಸಿಲಿಗೆ ಟ್ಯಾಟೂವನ್ನು ಒಡ್ಡಿಕೊಳ್ಳಬೇಡಿ. ಏಕೆಂದರೆ ರಾಸಾಯನಿಕಗಳು ಚರ್ಮದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಹುದು. ಒಂದು ತಿಂಗಳವರೆಗೆ ಚರ್ಮವನ್ನು ಆದಷ್ಟು ಜೋಪಾನವಾಗಿ ಕಾಪಾಡಿಕೊಳ್ಳಿ.
