ಉಡುಪಿ: 65 ವರ್ಷದ ಈಜು ಪಟು ಗಂಗಾಧರ ಜಿ.ಕಡೆಕಾರ್ ಎಂಬುವವರು ಮಲ್ಪೆ ಸಮೀಪದ ಪಡುಕೆರೆಯಲ್ಲಿ ಸಮುದ್ರದ ಅಲೆಯಬ್ಬರದ ನಡುವೆ ಕಾಲಿಗೆ ಸರಪಳಿ ಹಾಕಿಕೊಂಡು ಪದ್ಮಾಸನದಲ್ಲಿ ಈಜಿ ಹೊಸದೊಂದು ದಾಖಲೆ ಬರೆದಿದ್ದಾರೆ.
ಸಾಧಿಸುವ ಮನಸ್ಸಿದ್ದರೆ ಯಾವುದೂ ಅಡ್ಡಿಯುಂಟು ಮಾಡಲು ಸಾಧ್ಯವಿಲ್ಲ ಎಂಬುದಕ್ಕೆ ಇದೇ ಉತ್ತಮ ಉದಾಹರಣೆ. ಸಾಮಾನ್ಯವಾಗಿ ವಯಸ್ಸಾಯಿತೆಂದರೆ ಮೂಲೆಗೆ ಸೇರಿಕೊಳ್ಳುವವರ ನಡುವೆ ಈ ವ್ಯಕ್ತಿ ವಿಭಿನ್ನವಾದ ಪ್ರಯತ್ನಕ್ಕೆ ಮುಂದಾಗಿದ್ದಾರೆ.
ಈಜುವುದು ಸಾಮಾನ್ಯವಾಗಿ ಸಾಹಸವೇ. ಅದರಲ್ಲೂ ಸಮುದ್ರದಲ್ಲಿ ಅಲೆಗಳ ಅಬ್ಬರದ ನಡುವೆ ಈಜು ಸಾಮಾನ್ಯವಂತು ಅಲ್ಲವೇ ಅಲ್ಲ. ಅಂಥದರಲ್ಲಿ ಈ 65 ವರ್ಷದ ವ್ಯಕ್ತಿ ಅದು ಕಾಲಿಗೆ ಸರಪಳಿ ಕಟ್ಟಿಕೊಂಡು ಪದ್ಮಾಸನದಲ್ಲಿ ಈಜಿ ದಾಖಲೆ ಬರೆದಿದ್ದಾರೆ.
ನಮಗೆ ವಯಸ್ಸಾಯ್ತು ಇನ್ನೇನು ಇದೆಲ್ಲಾ ನಮಗ್ಯಾಕೆ ಅನ್ನೋ ವೃದ್ಧರಿಗೆ, ಮಾದರಿಯಾಗಿ ನಿಂತಿದ್ದಾರೆ. ಕಾಲಿಗೆ ಸರಪಳಿ ಕಟ್ಟಿಕೊಂಡೇ ಸುಮಾರು 1 ಗಂಟೆ 13 ನಿಮಿಷ 7 ಸೆಕೆಂಡ್ಗಳು ಸಮುದ್ರದಲ್ಲಿ ಈಜಿದ್ದಾರೆ ಅದೂ ಸಾಮಾನ್ಯವಾಗಿ ಅಲ್ಲ ಪದ್ಮಾಸನದ ಭಂಗಿಯಲ್ಲಿ ಈ ರೀತಿಯ ಸಾಧನೆ ಮಾಡಿದ್ದಾರೆ. ಬೆಳಗ್ಗೆ 8.36ರ ಸಮಯದಲ್ಲಿ ಸಮುದ್ರಕ್ಕೆ ಹಾರಿದ ಗಂಗಾಧರ್ 9.40ಕ್ಕೆ ದಡಕ್ಕೆ ವಾಪಸ್ಸಾಗಿದ್ದಾರೆ. ಲೋಟಸ್ ಫ್ಲೋಟ್ (ತಾವರೆ ತೇಲುವ) ಶೈಲಿಯಲ್ಲಿ ಸಮುದ್ರದಲ್ಲಿ ಈಜಿದ ಗಂಗಾಧರ್ ಸಾಹಸ ಇಂಡಿಯಾ ಬುಕ್ ಆಫ್ ರೆಕಾರ್ಡ್ನಲ್ಲಿ ದಾಖಲಾಗಿದೆ.