ಗಂಡ – ಹೆಂಡತಿ ಜಗಳ ಉಂಡು ಮಲಗೋ ತನಕ ಎಂಬ ಮಾತಿದೆ. ಆದರೆ ಮಧ್ಯ ಪ್ರದೇಶದಲ್ಲಿ ಗಂಡ – ಹೆಂಡತಿ ಜಗಳ ಪಕ್ಕದ ಮನೆಯ ಬಾಗಿಲು ಬಡಿಯುವಂತೆ ಮಾಡಿದೆ. ಮದ್ಯಪಾನ ಮಾಡಿದ್ದ ಪತಿ ರಾತ್ರೋರಾತ್ರಿ ಪತ್ನಿಯನ್ನು ಮನೆಯಿಂದ ಹೊರಗೆ ಅಟ್ಟಿದ್ದಾನೆ. ಇದಕ್ಕೆ ಕಾರಣ ಪಕ್ಕದ ಮನೆಯವಳ ಜೊತೆಯಿದ್ದ ಲವ್ವಿ-ಡವ್ವಿ..! ರಾತ್ರಿ ಕುಡಿದು ಬಂದ ಪತಿಯು ಪತ್ನಿಗೆ ಹಿಗ್ಗಾಮುಗ್ಗಾ ಥಳಿಸಿದ್ದಾನೆ.
ಅಲ್ಲದೇ ತಾನು ನೆರೆಮನೆಯವಳ ಜೊತೆ ಇರೋದಾಗಿಯೂ ಹೇಳಿದ್ದಾನೆ. ಪತಿಯ ಮನೆಯಿಂದ ಹೊರಗಟ್ಟಲ್ಪಟ್ಟ ಬಳಿಕ ಪೊಲೀಸ್ ಠಾಣೆಗೆ ಬಂದ ಪತ್ನಿಯು ತನ್ನ ಪತಿ ಹಾಗೂ ನೆರೆ ಮನೆಯಾಕೆ ವಿರುದ್ಧ ದೂರು ದಾಖಲಿಸಿದ್ದಾಳೆ. ಖಂಡ್ವಾ ಪೊಲೀಸ್ ಠಾಣೆಯಲ್ಲಿ ಈ ಪ್ರಕರಣ ಸಂಬಂಧ ದೂರು ದಾಖಲಾಗಿದೆ.
ದೂರಿನಲ್ಲಿ ರೂಪಾಲಿ ವರ್ಮಾ, ನನ್ನ ಪತಿ ಮನೀಷ್ ವರ್ಮಾ ನೆರೆಮನೆಯಾಕೆ ಜೊತೆ ಸೇರಿ ನನಗೆ ಮಧ್ಯರಾತ್ರಿ 2 ಗಂಟೆಯವರೆಗೂ ಥಳಿಸಿದ್ದಾರೆ. ಅಲ್ಲದೇ ನನಗೆ ಕೊಲೆ ಬೆದರಿಕೆ ಕೂಡ ನೀಡಿದ್ದಾರೆ. ಹೀಗಾಗಿ ನಾನು ಮನೀಷ್ ವರ್ಮಾ ಹಾಗೂ ನೆರೆಮನೆಯಾಕೆ ಅಜ್ಜೂಬಾಯಿ ವಿರುದ್ಧ ದೂರು ದಾಖಲಿಸುತ್ತಿರೋದಾಗಿ ಬರೆದಿದ್ದಾರೆ. ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಆರೋಪಿಗಳಿಬ್ಬರನ್ನೂ ಬಂಧಿಸಿದ್ದಾರೆ.
ಪೊಲೀಸರು ನೀಡಿರುವ ಮಾಹಿತಿಯ ಪ್ರಕಾರ ರೂಪಾಲಿ ಪತಿ ಮನೀಷ್ ಮದ್ಯವ್ಯಸನಿಯಾಗಿದ್ದ. ಪತ್ನಿಯು ಅನಾರೋಗ್ಯದಿಂದ ಬಳಲುತ್ತಿದ್ದರೂ ಸಹ ಪತಿ ಮನೀಷ್ ದಿನಕ್ಕೊಂದು ನೆಪವೊಡ್ಡಿ ಆಕೆಯ ಜೊತೆ ಜಗಳವಾಡುತ್ತಿದ್ದ. ಶನಿವಾರ ರಾತ್ರಿ ನೆರಮನೆಯಾಕೆ ಜೊತೆ ಸೇರಿ ಪತ್ನಿಗೆ ಹಿಗ್ಗಾಮುಗ್ಗಾ ಥಳಿಸಿದ್ದಾನೆ. ಜೊತೆಯಲ್ಲಿ ಕೊಲೆ ಬೆದರಿಕೆಯನ್ನೂ ಹಾಕಿದ್ದಾರೆ. ಇದೀಗ ಆರೋಪಿಗಳ ಬಂಧನವಾಗಿದ್ದು ವಿಚಾರಣೆ ಮುಂದುವರಿದಿದೆ ಎಂದು ಹೇಳಿದ್ದಾರೆ.
