ಚೆನೈ: ಮೊಬೈಲ್ ನಲ್ಲಿ ಆನ್‌ಲೈನ್ ಆಟಗಳನ್ನು ಆಡುತ್ತಿರುವ ಬಗ್ಗೆ ಪೋಷಕರು ಬುದ್ದಿವಾದ ಹೇಳಿದ್ದಕ್ಕೆ ಬೇಸರಗೊಂಡ 15 ವರ್ಷದ ಬಾಲಕ 33 ಲಕ್ಷ ರೂಪಾಯಿ ನಗದು ಹಾಗೂ 213 ಪವನ್ ಚಿನ್ನಾಭರಣಗಳೊಂದಿಗೆ ಮನೆಯಿಂದ ನಾಪತ್ತೆಯಾಗಿರುವ ಘಟನೆ ಶುಕ್ರವಾರ ಚೆನೈ ನಲ್ಲಿ ನಡೆದಿದೆ.
ಪೋಷಕರಿಂದ ದೂರವಾಗಿ ನೇಪಾಳಕ್ಕೆ ಹಾರುವುದು ಮತ್ತು ಯಾವುದೇ ತೊಂದರೆಯಿಲ್ಲದೆ ಆನ್‌ಲೈನ್ ಆಟಗಳನ್ನು ಆಡುವುದು ಅವನ ಯೋಜನೆಯಾಗಿತ್ತು. ಆತ ತನ್ನ ಹಳೆಯ ಮೊಬೈಲ್ ಫೋನ್ ಅನ್ನು ತ್ಯಜಿಸಿ, ಐಫೋನ್ ಖರೀದಿಸಿ, ಸಿಮ್ ಕಾರ್ಡ್ ಬದಲಾಯಿಸಿದ್ದ.
ಬಾಲಕನ ತಂದೆ ಮೆಟ್ರೋ ವಾಟರ್‌ನ ಗುತ್ತಿಗೆದಾರ ಮತ್ತು ಅವನ ತಾಯಿ, ಕಾಲೇಜು ಪ್ರಾಧ್ಯಾಪಕಿ, ಅವರು ಓಲ್ಡ್ ವಾಷರ್‌ಮೆನ್‌ಪೇಟ್ ಪ್ರದೇಶದಲ್ಲಿ ವಾಸವಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಅವನು ಯಾವಾಗಲೂ ಆನ್‌ಲೈನ್ ಆಟಗಳನ್ನು ಆಡುತ್ತಿದ್ದರಿಂದ, ಹೆತ್ತವರು ಬೈಯುತ್ತಿದ್ದರು. ಇತ್ತೀಚೆಗೆ, ಅವನ ಹೆತ್ತವರು ಅವನ ಮೊಬೈಲ್ ಫೋನ್ ಮುಟ್ಟದಂತೆ ತಾಕೀತು ಮಾಡಿದರು.
ಬುಧವಾರ, ತಂದೆ ಕೆಲಸಕ್ಕೆ ಹೋದ ನಂತರ, ತನ್ನ ಸ್ನೇಹಿತನನ್ನು ಭೇಟಿಯಾಗಲು ಮನೆಯಿಂದ ಹೊರಗೆ ಹೋಗಿದ್ದ ಅವನು ತಡರಾತ್ರಿಯವರೆಗೆ ಹಿಂತಿರುಗಲಿಲ್ಲ. ಇದೇ ವೇಳೆ ಕುಟುಂಬದವರು ಆತನನ್ನು ಹುಡುಕಲು ಆರಂಭಿಸಿದಾಗ ಮನೆಯಲ್ಲಿದ್ದ 33 ಲಕ್ಷ ರೂ. ಹಾಗೂ 213 ಪವನ್ ಆಭರಣಗಳು ನಾಪತ್ತೆಯಾಗಿರುವುದು ಗಮನಕ್ಕೆ ಬಂದಿದೆ.ಅಷ್ಟೊತ್ತಿಗಾಗಲೇ ಆ ಹುಡುಗ ತನ್ನ ಹಳೆಯ ಮೊಬೈಲ್ ಎಸೆದು ಐಫೋನ್ ಮತ್ತು ಹೊಸ ಸಿಮ್ ಕಾರ್ಡ್ ಖರೀದಿಸಿದ್ದ.
ಆದರೆ, ಸೈಬರ್ ಕ್ರೈಂ ಅಧಿಕಾರಿಗಳ ನೆರವಿನಿಂದ ಪೊಲೀಸರು ಸ್ಥಳ ಪತ್ತೆ ಹಚ್ಚಿದ್ದಾರೆ. ವಿಮಾನ ನಿಲ್ದಾಣದ ಬಳಿ ಉಳಿದುಕೊಳ್ಳಲು ಬಾಲಕ ತಾಂಬರಂನಲ್ಲಿರುವ ಹೋಟೆಲ್‌ನಲ್ಲಿ ಕೊಠಡಿಯನ್ನು ಸಹ ಕಾಯ್ದಿರಿಸಿದ್ದು, ಬಳಿಕ ಪೊಲೀಸ್ ತಂಡ ಆತನನ್ನು ವಾಷರ್‌ಮೆನ್‌ಪೇಟೆಗೆ ಕರೆತಂದು ಬೆಲೆಬಾಳುವ ವಸ್ತುಗಳನ್ನು ಸಮೇತ ಕುಟುಂಬಕ್ಕೆ ಸೇರಿಸಿದೆ.
