ಬೆಂಗಳೂರು : ಹಬ್ಬಗಳ ಹಿನ್ನೆಲೆಯಲ್ಲಿ 200 ವಿಶೇಷ ರೈಲುಗಳನ್ನು ಹೆಚ್ಚುವರಿಯಾಗಿ ಓಡಿಸುವುದಾಗಿ ಹೇಳಿದ್ದ ರೈಲ್ವೆ ಮಂಡಳಿ, ಸದ್ಯ 30 ವಿಶೇಷ ರೈಲುಗಳ ಸಂಚಾರಕ್ಕೆ ಒಪ್ಪಿಗೆ ನೀಡಿದೆ. ಶೀಘ್ರದಲ್ಲೇ ಈ ಹೆಚ್ಚುವರಿ ವಿಶೇಷ ರೈಲುಗಳು ಸಂಚಾರ ಆರಂಭಿಸಲಿವೆ ಎಂದು ಭಾರತೀಯ ರೈಲ್ವೆ ತಿಳಿಸಿದೆ.
ಇವು ಅಕ್ಟೋಬರ್ 15ರಿಂದ ಕಾರ್ಯನಿರ್ವಹಿಸುವ ಸಾಧ್ಯತೆ ಇದೆ ಎಂದು ತಿಳಿದುಬಂದಿದೆ. ಈ 30 ರೈಲುಗಳ ಪೈಕಿ ಐದು ರೈಲುಗಳು ಕರ್ನಾಟಕಕ್ಕೂ ಬರಲಿವೆ.
30 ರೈಲುಗಳಲ್ಲಿ ಹೆಚ್ಚಿನವು ಎಸಿ ಎಕ್ಸ್ಪ್ರೆಸ್ ರೈಲುಗಳಾಗಿವೆ. ತುರಂತೋ, ರಾಜಧಾನಿ ಮತ್ತು ಶತಾಬ್ದಿ ಎಕ್ಸ್ಪ್ರೆಸ್ ರೈಲುಗಳೂ ಇವೆ. ಅಸ್ಸಾಮ್ನ ಕಾಮಾಕ್ಯ, ರಾಜಸ್ಥಾನದ ಬಾರ್ಮರ್, ಪಶ್ಚಿಮ ಬಂಗಾಳದ ಹೌರಾಗಳಿಗೆ ಯಶವಂತಪುರದಿಂದ ರೈಲುಗಳ ವ್ಯವಸ್ಥೆ ಮಾಡಲಾಗಿದೆ.ಇವು ವಾರಕ್ಕೊಮ್ಮೆ ಹೋಗಿಬರುತ್ತವೆ.
ಬೆಂಗಳೂರು ಮತ್ತು ಚೆನ್ನೈ ಮಧ್ಯೆ ಶಬಾಬ್ದಿ ಮತ್ತು ಡಬಲ್ ಡೆಕರ್ ರೈಲುಗಳನ್ನು ಓಡಿಸಲಾಗುವುದು ಎಂದು ಮಂಡಳಿ ಹೇಳಿದೆ.
ಕಾಮಾಕ್ಯ-ಯಶವಂತಪುರ ಎಸಿ ಎಕ್ಸ್ಪ್ರೆಸ್ (ವಾರಕ್ಕೊಮ್ಮೆ), ಬಾರ್ಮರ್-ಯಶವಂತಪುರ ಎಸಿ ಎಕ್ಸ್ಪ್ರೆಸ್ (ವಾರಕ್ಕೊಮ್ಮೆ), ಹೌರಾ-ಯಶವಂತಪುರ ಎಸಿ ಎಕ್ಸ್ಪ್ರೆಸ್ (ವಾರಕ್ಕೊಮ್ಮೆ), ಬೆಂಗಳೂರು-ಚೆನ್ನೈ ಶತಾಬ್ದಿ ಎಕ್ಸ್ಪ್ರೆಸ್ (ಮಂಗಳವಾರ ಬಿಟ್ಟು ವಾರಕ್ಕೆ ಆರು ದಿನ), ಚೆನ್ನೈ-ಬೆಂಗಳೂರು ಡಬಲ್ ಡೆಕರ್ (ಪ್ರತಿದಿನ) ರೈಲುಗಳು ಕರ್ನಾಟಕದಲ್ಲಿ ಸಂಚರಿಸಲಿವೆ.
