ಮುಂಬೈ: ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧದ ಪಂದ್ಯದಲ್ಲಿ ರನ್ ಹೊಳೆಯೇ ಹರಿದಿದ್ದು, ವಿರೋಚಿತ ಹೋರಾಟದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡ ಸೋಲುಂಡಿದೆ. ಪಂದ್ಯದಲ್ಲಿ ಚೆನ್ನೈ ತಂಡ 5 ಎಸೆತ ಬಾಕಿ ಇರುವಂತೆಯೇ 19 ರನ್ಗಳ ಭರ್ಜರಿ ಗೆಲುವು ಪಡೆದುಕೊಂಡಿದೆ.
ಚೆನ್ನೈ ವಿರುದ್ದ ಗೆಲ್ಲಲು 221 ರನ್ಗಳ ಬಹೃತ್ ಟಾರ್ಗೆಟ್ ಪಡೆದ ಕೆಕೆಆರ್ ಉತ್ತಮ ಆರಂಭ ಪಡೆಯಲಿಲ್ಲ. 5.2 ಓವರ್ ಗಳಲ್ಲಿ ಕೇವಲ 31 ರನ್ಗಳಿಸಿದ್ದ ಕೆಕೆಆರ್ ತಂಡ ತನ್ನ ಬ್ಯಾಟಿಂಗ್ ಲೈನ್ನ ಪ್ರಮುಖ ಐವರು ಆಟಗಾರರನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಈ ಹಂತದಲ್ಲಿ ಒಂದಾದ ದಿನೇಶ್ ಕಾರ್ತಿಕ್ ಮತ್ತು ರಸೆಲ್ ಜೋಡಿ ಸ್ಫೋಟಕ ಬ್ಯಾಟಿಂಗ್ ನಡೆಸಿ ತಂಡ ಗೆಲುವಿನ ಆಸೆಯನ್ನು ಚಿಗುರೊಡೆಯುವಂತೆ ಮಾಡಿದ್ದರು.
22 ಎಸೆತಗಳಲ್ಲಿ 54 ರನ್ಗಳಿಸಿ ಚೆನ್ನೈ ಮಾರಕವಾಗಿ ಪರಿಣಮಿಸುತ್ತಿದ್ದ ರಸೆಲ್ರನ್ನು ಸ್ಯಾಮ್ ಕರನ್ ಪೆವಿಲಿಯನ್ಗೆ ಕಳುಹಿಸಲು ಯಶಸ್ವಿಯಾದರು. ಆ ವೇಳೆಗೆ ಕೆಕೆಆರ್ 11.2 ಓವರ್ ಗಳಲ್ಲಿ 112 ರನ್ ಗಳಿಸಿತ್ತು.
ಕೋಲ್ಕತ್ತಾ ಗೆಲುವಿಗೆ ಸಾಕಷ್ಟು ಶ್ರಮಿಸಿದ ಪ್ಯಾಟ್ ಕಮ್ಮಿನ್ಸ್ 34 ಎಸೆತಗಳಲ್ಲಿ 6 ಸಿಕ್ಸರ್ ಹಾಗೂ 4 ಬೌಂಡರಿಗಳ ನೆರವಿನಿಂದ 66 ರನ್ಗಳಿಸಿದರು. ವಿಕೆಟ್ ಉರುಳುತ್ತಿದ್ದರೂ ರನ್ ಗಳಿಕೆಯ ವೇಗವನ್ನು ಹೆಚ್ಚಿಸುತ್ತಲೇ ಸಾಗಿದ ಕಮ್ಮಿನ್ಸ್, ಕರನ್ ಬೌಲಿಂಗ್ನಲ್ಲಿ ಬರೋಬ್ಬರಿ 30 ರನ್ ಸಿಡಿಸಿ ಮಿಂಚಿದ್ದರು. ಆದರೆ ದಿನೇಶ್ ಕಾರ್ತಿಕ್ 40 ರನ್ಗಳಿಸಿ ನಿಗರ್ಮಿಸಿದರು. ಆದರೆ ಕಮ್ಮಿನ್ಸ್ ಸ್ಟ್ರೈಕ್ ಗಳಿಸುವ ಎರಡು ರನ್ ಔಟ್ಗಳು ಕೋಲ್ಕತ್ತಾ ತಂಡದ ಹೋರಾಟವನ್ನು 202 ರನ್ಗಳಿಗೆ ಅಂತ್ಯಗೊಳಿಸಿತು.
ಇದಕ್ಕೂ ಮುನ್ನ ಟಾಸ್ ಸೋತು ಬ್ಯಾಟಿಂಗ್ ನಡೆಸಿದ ಚೆನ್ನೈ ತಂಡ ಋತುರಾಜ್ ಗಾಯಕವಾಡ್, ಡುಪ್ಲೆಸಿಸ್ರ ಅಜೇಯ 95 ರನ್ಗಳ ನೆರವಿನಿಂದ 220 ರನ್ಗಳ ಬೃಹತ್ ಮೊತ್ತವನ್ನು ಪೇರಿಸಿತು. ಉಳಿದಂತೆ ಚೆನ್ನೈ ಪರ ಧೋನಿ 17 ರನ್, ಮೊಯಿನ್ ಅಲಿ 25 ಹಾಗೂ ಒಂದು ಎಸೆತ ಎದುರಿಸಿದ ಜಡೇಜಾ 6 ರನ್ ಗಳಿಸಿದರು.