ಪುತ್ತೂರು: ರಾಜಕೀಯದಲ್ಲಿ ಟೀಕೆಗಳು ಸಹಜ, ಆದರೆ ಆ ಟೀಕೆಗಳು ಸತ್ಯದ ಅಡಿಪಾಯದ ಮೇಲೆ ಇರಬೇಕು. ಪುತ್ತೂರಿನ ಇಂದಿನ ರಾಜಕೀಯ ಪರಿಸ್ಥಿತಿ ಹೇಗಿದೆಯೆಂದರೆ, ಶಾಸಕ ಅಶೋಕ್ ಕುಮಾರ್ ರೈ ಅವರ ಅಭಿವೃದ್ಧಿ ವೇಗವನ್ನು ಕಂಡು ಕಣ್ಣು ಕೆಂಪಗೆ ಮಾಡಿಕೊಂಡಿರುವ ವಿರೋಧ ಪಕ್ಷ ಬಿಜೆಪಿ, ಈಗ ಹತಾಶೆಯ ತುತ್ತತುದಿಗೆ ತಲುಪಿದೆ.
ಈ ಹತಾಶೆಯ ಪ್ರತಿಭಟನೆಗೆ ಪುತ್ತೂರು ಬ್ಲಾಕ್ ಮಹಿಳಾ ಕಾಂಗ್ರೆಸ್ ಕಾರ್ಯಾಧ್ಯಕ್ಷೆ ಚಂದ್ರಪ್ರಭಾ ಗೌಡ ಅವರು ತೀಕ್ಷ್ಣ ತಿರುಗೇಟು ನೀಡಿದ್ದಾರೆ.
“ಶಾಸಕ ಅಶೋಕ್ ರೈಗಳ ಆಡಳಿತದಲ್ಲಿ ಒಂದು ಸಣ್ಣ ತಪ್ಪನ್ನು ಹುಡುಕಲು ಬಿಜೆಪಿ ನಾಯಕರು ಈಗ ಹಗಲು ಹೊತ್ತಿನಲ್ಲೇ ಟಾರ್ಚ್ ಹಿಡಿದು ಕತ್ತಲೆಯಲ್ಲಿ ತಡಕಾಡುತ್ತಿದ್ದಾರೆ
ಹೌದು, ಕಳೆದ ಮೂರು ವರ್ಷಗಳಲ್ಲಿ ಪುತ್ತೂರು ಕಂಡಿರುವ ಬದಲಾವಣೆ ಅಭೂತಪೂರ್ವ. ರಸ್ತೆ, ಸೇತುವೆ, ಶಿಕ್ಷಣ ಮತ್ತು ಸಾರ್ವಜನಿಕ ಸೌಲಭ್ಯಗಳ ವಿಷಯದಲ್ಲಿ ಶಾಸಕರು ತೋರುತ್ತಿರುವ ಪಾರದರ್ಶಕತೆ ವಿರೋಧಿಗಳಿಗೆ ನುಂಗಲಾರದ ತುತ್ತಾಗಿದೆ. ಯಾವುದೇ ಭ್ರಷ್ಟಾಚಾರದ ಕಪ್ಪು ಚುಕ್ಕೆ ಇಲ್ಲದ ಆಡಳಿತವನ್ನು ಸಹಿಸಲಾಗದೆ ಬಿಜೆಪಿ ಈಗ ಮಹಿಳಾ ಮೋರ್ಚಾವನ್ನು ಬೀದಿಗೆ ಇಳಿಸಿರುವುದು ಅವರ ರಾಜಕೀಯ ದಿವಾಳಿತನವನ್ನು ಎತ್ತಿ ತೋರಿಸುತ್ತಿದೆ.
ಮಹಿಳೆಯರ ಗೌರವದ ಬಗ್ಗೆ ಮಾತನಾಡುವ ಬಿಜೆಪಿ “ನಿಮ್ಮದೇ ಪಕ್ಷದ ಮುಖಂಡನ ಪುತ್ರನೊಬ್ಬ ಯುವತಿಗೆ ವಂಚನೆ ಮಾಡಿದಾಗ ನಿಮ್ಮ ಈ ಮಹಿಳಾ ಪ್ರೇಮ ಎಲ್ಲಿ ಅಡಗಿತ್ತು?” ಎಂದು ಅವರು ನೇರವಾಗಿ ಗುಡುಗಿದ್ದಾರೆ.
ಅಂದು ಸಂತ್ರಸ್ತ ಮಹಿಳೆಯ ಪರವಾಗಿ ಒಂದು ಸಣ್ಣ ಧ್ವನಿ ಎತ್ತದ ಬಿಜೆಪಿ ಮಹಿಳಾ ಮೋರ್ಚಾ, ಇಂದು ಕೇವಲ ರಾಜಕೀಯ ಲಾಭಕ್ಕಾಗಿ ಮತ್ತು ಶಾಸಕರ ವರ್ಚಸ್ಸಿಗೆ ಧಕ್ಕೆ ತರಲು ಪ್ರತಿಭಟನೆ ಮಾಡುತ್ತಿರುವುದು ಕೇವಲ ‘ಗಿಮಿಕ್’ ಅಷ್ಟೇ ಎಂದು ಅವರು ಬಣ್ಣಿಸಿದ್ದಾರೆ.
ಮಹಿಳಾ ಕಾಲೇಜಿನ ಪ್ರಾಂಶುಪಾಲರ ಅಮಾನತು ವಿಚಾರದಲ್ಲಿ ಬಿಜೆಪಿ ಮಾಡುತ್ತಿರುವ ಆರೋಪಗಳನ್ನು ಚಂದ್ರಪ್ರಭಾ ಗೌಡ ಅವರು ತರ್ಕಬದ್ಧವಾಗಿ ತಳ್ಳಿಹಾಕಿದ್ದಾರೆ. “ತಪ್ಪು ಮಾಡಿದ ಅಧಿಕಾರಿಯ ವಿರುದ್ಧ ಕ್ರಮ ಕೈಗೊಳ್ಳುವುದು ಸರ್ಕಾರದ ನಿಯಮ. ಅದನ್ನು ದಬ್ಬಾಳಿಕೆ ಎಂದು ಬಿಂಬಿಸುವುದು ಸರಿಯಲ್ಲ. ವಿದ್ಯಾರ್ಥಿನಿಯರನ್ನು ಬೀದಿಯಲ್ಲಿ ನಿಲ್ಲಿಸಿ ರಾಜಕೀಯ ಮಾಡುವ ಸಂಸ್ಕೃತಿ ಕಾಂಗ್ರೆಸ್ಸಿಗರಿಲ್ಲ, ಅದು ಬಿಜೆಪಿಯವರ ಚಾಳಿ,” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಅಭಿವೃದ್ಧಿಯೇ ನಮ್ಮ ಶ್ರೀರಕ್ಷೆ
ಮಾಜಿ ಶಾಸಕರಿಂದ ಕಲಿಯುವಂತೆ ನೀಡಿದ ಸಲಹೆಗೆ ಉತ್ತರಿಸಿದ ಅವರು, ಸೋತು ಮನೆಯಲ್ಲಿ ಕುಳಿತವರಿಂದ ಕಲಿಯುವಂತಹದ್ದು ಅಶೋಕ್ ರೈಗಳಿಗೆ ಏನೂ ಇಲ್ಲ. ಪುತ್ತೂರಿನ ಜನರೇ ಅಶೋಕ್ ರೈಗಳ ಕೆಲಸಕ್ಕೆ ಮನ್ನಣೆ ನೀಡಿದ್ದಾರೆ. ಅಭಿವೃದ್ಧಿಯ ಅಂಕಿ-ಅಂಶಗಳ ಬಗ್ಗೆ ಚರ್ಚಿಸಲು ಮಹಿಳಾ ಕಾಂಗ್ರೆಸ್ ಯಾವುದೇ ವೇದಿಕೆಯಲ್ಲೂ ಸಿದ್ಧವಿದೆ ಎಂದು ಸವಾಲು ಹಾಕಿದ್ದಾರೆ.
