ನವದೆಹಲಿ: ವಾಟ್ಸ್ಆ್ಯಪ್ ಪ್ರೈವೆಸಿ ಪಾಲಿಸಿ ವಿವಾದದ ಬೆನ್ನಲ್ಲೇ ಹಲವಾರು ಗ್ರಾಹಕರು ಸಿಗ್ನಲ್ ಹಾಗೂ ಇನ್ನಿತರೆ ಮೆಸೇಜಿಂಗ್ ಆ್ಯಪ್ಗಳ ಮೊರೆ ಹೋಗಿದ್ದಾರೆ. ಇದೀಗ ಭಾರತ ಸರ್ಕಾರ ವಾಟ್ಸ್ಆ್ಯಪ್ಗೆ ಪರ್ಯಾಯವಾಗಿ ತನ್ನದೇ ಎರಡು ಸ್ವಂತ ಆ್ಯಪ್ಗಳನ್ನ ಸಿದ್ಧಪಡಿಸಿದ್ದು, ಸದ್ಯ ಅವುಗಳ ಪರೀಕ್ಷೆ ನಡೆಸಲಾಗ್ತಿದೆ ಎಂದು ವರದಿಯಾಗಿದೆ.
ಎರಡು ಅಪ್ಲಿಕೇಶನ್ಗಳನ್ನು ಬೀಟಾ ಹಂತದಲ್ಲಿ ಪರೀಕ್ಷಿಸಲಾಗುತ್ತಿದೆ ಎಂಬುದನ್ನ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಮೂಲಗಳು ಖಚಿತಪಡಿಸಿವೆ ಎನ್ನಲಾಗಿದೆ. ಈ ಆ್ಯಪ್ಗಳಿಗೆ ಸಂವಾದ್ ಮತ್ತು ಸಂದೇಸ್ ಎಂಬ ಕೋಡ್ನೇಮ್ಗಳನ್ನ ನೀಡಲಾಗಿದೆ.
ಗವರ್ನಮೆಂಟ್ ಆಫ್ ಇಂಡಿಯಾ ನೌಕರರಿಗಾಗಿಯೇ GIMS ಆ್ಯಪ್ ಸಂದೇಸ್ ಮತ್ತು ಸಂವಾದ್ ಆ್ಯಪ್ಗಳನ್ನು ಸಂಪೂರ್ಣವಾಗಿ ಭಾರತ ಸರ್ಕಾರವೇ ಅಭಿವೃದ್ಧಿಪಡಿಸುತ್ತಿದೆ. ಇದು ವಾಟ್ಸ್ ಆ್ಯಪ್ ರೀತಿಯ ತ್ವರಿತ ಮೆಸೇಜಿಂಗ್ ಅಪ್ಲಿಕೇಶನ್ ಎಂದು ಸಚಿವಾಲಯದ ಸಿಬ್ಬಂದಿಯೊಬ್ಬರು ತಿಳಿಸಿದ್ದಾರೆ.
ಅಲ್ಲದೆ ಕೇಂದ್ರ ಸರ್ಕಾರದ ನೌಕರರಿಗೆ ಸಂವಹನ ಮಾಡಲು ಮಾತ್ರ, ಸರ್ಕಾರಿ ತ್ವರಿತ ಮೆಸೇಜಿಂಗ್ ಸೇವೆ(GIMS -Government Instant Messaging Service ) ಎಂಬ ಆ್ಯಪ್ಗಾಗಿ ಭಾರತ ಸರ್ಕಾರ ಪ್ಲಾನ್ ಮಾಡಿದೆಯಂತೆ.ಸರ್ಕಾರದೊಳಗೆ ಬಹಳ ಸಮಯದಿಂದ ನಮ್ಮದೇ ಆದ ಸ್ವಂತ, ಸ್ವತಂತ್ರ ಮತ್ತು ಸ್ವ-ಸ್ವಾಮ್ಯದ ತ್ವರಿತ ಮೆಸೇಜಿಂಗ್ ಸೇವೆಯನ್ನು ಹೊಂದುವ ಅಗತ್ಯತೆ ಇದೆ ಎಂಬುದು ಗಮನಕ್ಕೆ ಬಂದಿತ್ತು.
ವಾಟ್ಸ್ಯಾಪ್ ವಿವಾದ ಶುರುವಾಗುವ ಮುಂಚೆಯೇ ಈ ಅಪ್ಲಿಕೇಶನ್ಗಳ ಅಭಿವೃದ್ಧಿ ಪ್ರಾರಂಭವಾಗಿತ್ತು. ಈ ಅಪ್ಲಿಕೇಶನ್ನ ಅತೀ ಮುಖ್ಯ ಪ್ರಯೋಜನವೆಂದರೆ ಡೇಟಾವನ್ನು ಕದಿಯುವ ಅಥವಾ ದೊಡ್ಡ ಟೆಕ್ ಕಂಪನಿಗಳು ವಾಣಿಜ್ಯ ಲಾಭಕ್ಕಾಗಿ ಬಳಸುವುದರ ಬಗ್ಗೆ ನಾವು ಯಾವತ್ತೂ ಚಿಂತಿಸಬೇಕಾಗಿಲ್ಲ ಎಂದು ಮೂಲಗಳು ತಿಳಿಸಿವೆ. ಆದ್ರೆ ಜನರು ಈ ಆ್ಯಪ್ಗಳನ್ನ ಹೇಗೆ ಸ್ವೀಕರಿಸುತ್ತಾರೆ ಅನ್ನೋದು ಸಾರ್ವಜನಿಕವಾಗಿ ಅಪ್ಲಿಕೇಷನ್ ಬಿಡುಗಡೆ ಮಾಡಿದ ನಂತರವಷ್ಟೇ ಗೊತ್ತಾಗಲಿದೆ.
ಸಂದೇಸ್ ಹಾಗೂ ಸಂವಾದ್ ಎರಡೂ ಆ್ಯಪ್ಗಳನ್ನ ಸಾರ್ವಜನಿಕರ ಬಳಕೆಗೆ ರಿಲೀಸ್ ಮಾಡ್ತಾರಾ ಅಥವಾ ಎರಡರಲ್ಲಿ ಒಂದು ಮಾತ್ರ ಜನರ ಬಳಕೆಗೆ ಲಭ್ಯವಾಗುತ್ತಾ ಅನ್ನೋದು ಸದ್ಯಕ್ಕೆ ಸ್ಪಷ್ಟವಾಗಿಲ್ಲ. ಬೀಟಾ ಪರೀಕ್ಷೆ ಮುಗಿದ ನಂತರ ಪ್ರಧಾನಿ ನರೇಂದ್ರ ಮೋದಿ ಅವರೇ ರಾಷ್ಟ್ರಕ್ಕೆ ಈ ಆ್ಯಪ್ ಅರ್ಪಿಸುವ ನಿರೀಕ್ಷೆಯಿದೆ ಎಂದು ಮೂಲಗಳು ಮಾಹಿತಿ ನೀಡಿವೆ.
ಕೆಲವು ಜನರಿಗೆ ಮಾತ್ರ ಪರೀಕ್ಷಾರ್ಥ ಪ್ರಯೋಗದ ಸಲುವಾಗಿ ಸಂದೇಸ್ ಆ್ಯಪ್ ಸದ್ಯ ಆ್ಯಪಲ್ ಸ್ಟೋರ್ನಲ್ಲಿ ಲಭ್ಯವಿದೆ. ಆ್ಯಪ್ ಮೇಲೆ ಅಶೋಕ್ ಚಕ್ರ ಲೋಗೋ ಇದೆ. ಸದ್ಯಕ್ಕೆ ಈ ಆ್ಯಪ್ ಸರ್ಕಾರಿ ನೌಕರರನ್ನ ಮಾತ್ರ ವೆರಿಫೈ ಮಾಡುತ್ತಿದ್ದು, ಅವರ ಬಳಕೆಗೆ ಮಾತ್ರ ಲಭ್ಯವಾಗಿದೆ. ಎರಡರಲ್ಲಿ ಒಂದು ಅಪ್ಲಿಕೇಶನ್ ನನ್ನು ಮಾತ್ರ ಸಾರ್ವಜನಿಕರಿಗೆ ಬಿಡುಗಡೆ ಮಾಡಿ, ಮತ್ತೊಂದನ್ನ ಸರ್ಕಾರಿ ನೌಕರರ ಆಂತರಿಕ ಬಳಕೆಗಾಗಿ ಮಾತ್ರ ಉಳಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ ಎಂದು ಮೂಲಗಳು ತಿಳಿಸಿರುವುದಾಗಿ ವರದಿಯಾಗಿದೆ.