ನವದೆಹಲಿ: ಕೇಂದ್ರದ ಕೃಷಿ ಕಾಯ್ದೆಗಳನ್ನ ವಿರೋಧಿಸಿ ದೆಹಲಿಯಲ್ಲಿ ರೈತರು ನಡೆಸುತ್ತಿರೋ ಟ್ರ್ಯಾಕ್ಟರ್ ರ್‍ಯಾಲಿ ಘರ್ಷಣೆಗೆ ಸಾಕ್ಷಿಯಾಗಿದೆ. ದೆಹಲಿಯ ಹೃದಯಭಾಗದಲ್ಲಿ ಪೊಲೀಸರೊಂದಿಗೆ ಘರ್ಷಣೆ ನಡೆಸಿದ ಸಾವಿರಾರು ರೈತರು ಇದೀಗ ಕೆಂಪು ಕೋಟೆಯನ್ನ ಪ್ರವೇಶಿಸಿದ್ದಾರೆ.
ತ್ರಿವರ್ಣ ಧ್ವಜವುಳ್ಳ 20ಕ್ಕೂ ಹೆಚ್ಚು ಟ್ರ್ಯಾಕ್ಟರ್ಗಳು ಕೆಂಪು ಕೋಟೆಯೊಳಗೆ ಬಂದಿವೆ. ರೈತರು ಘೋಷಣೆಗಳನ್ನ ಕೂಗುತ್ತಾ ಪ್ರತಿಭಟಿಸುತ್ತಿದ್ದಾರೆ. ಈ ವೇಳೆ ರೈತರು ಧ್ವಜಗಳನ್ನ ಪ್ರದರ್ಶಿಸಿದರು. ಅಲ್ಲದೆ ರೈತರೊಬ್ಬರು ಅಲ್ಲಿದ್ದ ಕಂಬವನ್ನೇರಿ ತಮ್ಮ ಸಂಘಟನೆಯ ಧ್ವಜವನ್ನ ಹಾರಿಸಿದ್ದಾರೆ.
ಇಂದು ಗಣರಾಜ್ಯೋತ್ಸವದ ಪರೇಡ್ ಮುಗಿದ ಬಳಿಕ 12 ಗಂಟೆಯಿಂದ 5 ಗಂಟೆವರೆಗೆ ಱಲಿ ನಡೆಸಲು ದೆಹಲಿ ಪೊಲೀಸರು ರೈತರಿಗೆ ಷರತ್ತುಬದ್ಧ ಅನುಮತಿ ನೀಡಿದ್ದರು. ಆದ್ರೆ ಕೆಲವು ರೈತರು ನಿಗದಿತ ಸಮಯಕ್ಕೂ ಮುನ್ನವೇ ರ್‍ಯಾಲಿ ಆರಂಭಿಸಿ, ದೆಹಲಿ ಪ್ರದೇಶಿಸಲು ಪೊಲೀಸರ ಬ್ಯಾರಿಕೇಡ್ಗಳನ್ನ ಉರುಳಿಸಿ ಮುಂದೆ ಸಾಗಿದ್ರು.
ಅಲ್ಲದೆ ದೆಹಲಿ ಐಟಿಓದಲ್ಲಿ ಬಸ್ವೊಂದನ್ನ ಧ್ವಂಸ ಮಾಡಿದ್ದಾರೆ. ಮೊದಲೇ ನಿಗದಿಯಾಗಿದ್ದ ರೂಟ್ ಮ್ಯಾಪ್ ಉಲ್ಲಂಘಿಸಿದ್ದಾರೆ. ಹೀಗಾಗಿ ಪೊಲೀಸರು ಲಾಠಿ ಚಾರ್ಜ್ ಮತ್ತು ಅಶ್ರುವಾಯು ಪ್ರಯೋಗ ನಡೆಸಿದ್ದಾರೆ. ಘರ್ಷಣೆ ವೇಳೆ ಹಲವಾರು ಪೊಲೀಸರು ಕೂಡ ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
